Повеќе од 20 млади лекари поднесоа претставка до министерот за здравство Никола Тодоров бидејќи цел месец не можат да работат и специјализираат поради директорите од ДУИ кои одбиваат да ги потпишат нивните договори.

Тие се група на специјализанти од конкурсот за кофинансирање на приватни специјализации кои треба да бидат примени на ТОАРИЛУЦ, Клиниката за детски болести, како и болниците во Струга, Гостивар и Тетово. Во јули  договорите биле потпишани од нивна страна, од министерот за здравство и од организациониот директор на ТОАРИЛУЦ, но директорот Реџеп Селмани како и директорите од споменатите болници, не сакаат да ги потпишат договорите.

„Од за нас непознати причини директорот веќе два месеца не сака да ги потпише договорите без концизно образложение, со што ни нанесува материјална и нематеријална штета. Во меѓувреме на другите кандидати избрани на конкурсот во други ЈЗУ, договорите им се потпишани и тие работат од месец август“ , се вели во претставката.

Специјализантите бараат од министерот Тодоров да бидат известени зошто директорите одбиваат да ги потпишат договорите и дали има законска пречка за тоа.