По поразот на свој терен од Македонија ЃП, последнопласирана екипа на табелата во фудбалскиот шампионат, новиот тренер на Ф.К. Брегалница вчера беше нападнат од раководството на клубот. Претседателот на Брегалница, Мите Митев и директорот на клубот, Иле Колев од една страна се степале со турскиот тренер Јуксел Јесилова.
Штипјани загубија во Кочани со 2:1. Инцидентот се случил по завршување на мечот, на патот Кочани – Штип кај селото Крупиште.
Јесилова се движел со своето „Порше“ кое го управувала неговата сопруга во кое било и 9 годишно дете. Во еден момент пред се испречил „Мерцедес“ во кој биле Колев и Митев. Двајцата излегле од возилото и со шипки во рацете се упатиле кон тренерот на клубот, со кој најпрво почнала вербална расправија, која прераснала во физичка премсметка. Настанала турканица по што Јесилова и Колев паднале во каналот кој се наоѓал покрај патот.
Двајцата биле пренесени во болница каде им се констатирани телесни повреди. Од полицијата соопштија дека со Колев и Јессилова се извршени разговор во полициска станица и се работи на целосно расчистување на случајот.
Мечот во Кочани за штипјани сомнителен?
Неофицијално како причина за нападот се наведуваат многубројните несогласувања во фудбалскиот клуб. Дел од медиумите пренесуваат гласини за можно лажирање на натпреварот, бидејќи „двојката“ убаво се плаќала во спортските обложувалници ширум светот. Коефициентот за победа на скопскиот клуб, кој беше аутсајдер во мечот, достигна и до 6.
Интернет порталот „Екипа“ објави дека раководството на клубот, Митев и Колев, денеска си поднеле оставки.
„Ниту сме нападнале некого, ниту дадовме понуди за купување на Брегалница. Не сме воопшто заинтересирани за тоа. За доброто на овој клуб, сметаме дека нашето место не е повеќе тука и поднесовме оставки од нашите функции“ – изјавил Мите Митев за Екипа.
Јесилова дојде во Брегалница пред помалку од два месеци, иако официјално клубот се уште не е продаден и е во сопственост на општина Штип. Во понеделник е закажано јавно отворање на понудите на јавниот повик на локалната самоуправа за продажба на клубот. НОВАТВ веќе пишуваше за сомнителното отуѓување на Брегалница, која наводно треба да падне во турски раце.