Вкупно 28 лекари специјалисти од Србија и девет од Грција се пријавиле на огласот за работа што пред две години го распиша македонското Министерството за здравство. Но, ниту еден од нив досега не е ангажиран да работи во македонските болници. Од Министерството за здравство не објаснуваат зошто е распишан огласот во Србија и во други земји, кога ниту еден лекар не е примен да работи во Македонија. Зошто не се примени пријавените кандидати и која е суштината на огласот за кој своевремено пишуваа и српските медиуми. Од ресорното министерство з а НОВА потврдија дека направиле база на избраните кандидати и кога ќе се појавела потреба од нивната специјалност, ќе биделе ангажирани.
„Со сите кандидати беше направено интервју со лекари по соодветните специјалности и Министерството за здравство има база на избрани кандидати од сите кои аплицирале, но истите ќе бидат ангажирани кога ќе се појави потреба во областа на нивна експертиза“, се вели во одговорот на Министерството за здравство.
Во огласот објавен во Србија, до кој дојде НОВА, Македонското министерство на српските лекари им нуди екстра услови за работа и солидни примања, како што немаат македонските лекари кога би се пријавиле да работат во друг град. Во огласот стои дека лекарите кои ќе се пријават ќе имаат обезбедено сместување, соодветен надоместок за нивниот ангажман и надоместок за патни трошоци.
Министерот Тодоров бара специјалистите да имаат најмалку 10 години работно искуство и тоа да се од областа на офталмологијата, анестезија и реанимација, гинекологија, неонатологија, васкуларна хирургија, ендокринолошка хирургија, гинеколошко-онколошка хирургија, ортопедија и урологија.
Но Тодоров не барал само лекари специјалисти во Србија. Македонското министерство таму распишало оглас и за професори од Медицинскиот факултет или доктори на медицински науки за учество во комисиите за стручен надзор на терцијално ниво. Српските професори требало да ги оценуваат како работат македонските доктори од клиничкиот центар, да вршат контрола на нивната стручна работа, да ги спроведат упатствата, како и да направат проценка на условите и начинот на давање на здравствена услуга. Во истиот оглас е се повикуваат и професори од Бугарија, Хрватска, Словенија, Австрија, Германија, Англија, Франција, Русија и САД, како македонски доктори кои непрекинато повеќе од пет години работат или работеле во земјите членки на ОЕЦД.
За нив Министерството за здравство во огласот ветува обезбедено сместување, превоз и паричен надоместок од 700 евра.
Во огласот стои дека секој од професорите во текот на тридневниот стручен надзор има обврска да присуствува на пет прегледи, пет интервентни процедури, пет хуруршки интервенции и да одржи предавање на Медицинскиот факулет од својата специјалност.
На ваквиот оглас на министерот Тодоров се пријавил само еден кандидат и две години откако е објавен се уште се разгледува можноста за негово ангажирање.
„Што се однесува до огласот за ангажирање професори од Медицински факултети и доктори од медицински науки кои се специјалисти или супспецијалисти за учество во комисиите за стручен назор во ЈЗУ на терциерно ниво кој е објавен во месец септември, 2014г на истиот е пријавен еден кандидат и се разгледува можноста за негово евентуално ангажирање, а во согласност со потребите од соодветната стручна област“, се вели во одговорот од Министерството з а здравство.
Одлуката на Тодоров да бара лекари од соседните држави не донесе решение на проблемот со недостиг на специјалисти. Болниците во државата се празни, недостасуваат специјалисти од различни области, а не се гледа крај ниту на специјализациите кои почнаа масовно да се доделуваат без стратегија и мапирање во која болница каков лекар специјалист недостасува.