Лазар Еленовски се отповикува од должноста амбасадор на Република Македонија во Белгија и во Луксемург. Оваа одлука со потпис на Претседателот Ѓорѓе Иванов е објавена денеска во „Службен весник“. Еленовски се враќа во Македонија, бидејќи му истекува неговиот мандат заклучно со 31 декември годинава.
Еленовски за амбасадор во Брисел беше назначен во јули 2012 година, како предлог на ДУИ. Тој пред да стапи на оваа функција, беше министер за одбрана во Владата на Никола Груевски од 2006 до 2008 година од редовите на НСДП. Потоа Еленовски, заедно со Веле Митановски и Вера Рафајловска ја напуштија НСДП и ја формираа Социјалдемократската Унија. Лазар Еленовски беше избран на претседател, каде остана се до назначувањето на амбасадорската функција во Белгија.
Пред да замине за Брисел, кога ја презентираше својата програма на собраниската Комисија за надворешна политика, Еленовски проговори и на албански јазик за да го докаже своето мултиетничко потекло и да го оправда фактот што ДУИ го предложи за амбасадор во Брисел.
Во презентацијата на програмата, Еленовски вети дека за време на амбасадорскиот мандат ќе се залага за унапредување на пријателските односи и економските врски меѓу Македонија и Белгија, а ќе работи и на потребите со кои се соочуваат околу шест илјади македонски граѓани кои живеат во оваа земја.
Претходно на позицијата амбасадор во Брисел беше поранешниот пратеник и министер Мухамед Халили. Засега нема никакви информации кој ќе го замени Еленовски во амбасадата во Брисел.