Агенцијата за храна и ветеринарство попладнево се огласи со соопштение за случајот на труење на 3 малолетни деца со енергетски пијалок, за што објави МВР во денешниот билтен. Оттаму велат дека од епидемиолошката служба на Центарот за јавно здравјe – Скопје, се уште немаат добиено официјална информација за пријава за труење со храна и за хоспитализирани лица.
„Производот Симба кој во медиумите се посочува како причинител на труењето со храна на малолетните лица е безалкохолен пијалак, на кој соодветно е означено дека не се препорачува за деца под 18 години и за бремени жени. Не станува збор за небезбеден производ, ниту за труење со храна, туку за непочитување на означувањето од страна на лицата кои го консумирале. Во тек е постапка од надлежните институции за тоа како овој пијалак дошол до малолетните лица. “, пишува во соопштението од Агенцијата за храна и ветеринарство.
МВР денеска информираше дека труењето од енергетски пијалоци било констатирано кај три деца од 11 и 12 години. Според полицискиот билтен, на 1 ноември на Детскатата клиника во Скопје биле донесени тројца малолетеници затруени од енергетски пијалоци. Децата се примени на пулмо-токсиколошкиот оддел, дадена им е соодветна терапија и задржани се на понатамошно лекување. Во добра општа состојба се, велат на Клиниката зa детски болести.
НОВА веќе пишуваше дека продажбата на енергетски пијалоци во Македонија се наоѓа во сива зона.
“Нема никава законска рамка освен означувањето на опаковката за состојките што ги содржат овие пијалоци. Македонските институции за безбедноста на храна и пијалоци немаат проценка за ризиците од употребата на енергетските пијалоци особено ако тие се комбинираат со алкохол или за време на голема физичка активност”, вели за НОВА извор од една македонска институција задолжена за испитување на безбедноста на храната.
Ова е особено значајно ако се знае дека младите лица често ги пијат овие производи. Но во Македонија не постојат статистики за тоа колку се пие и колкава е возраста на лицата кои пијат.