Лицата на снимките на „Сител ТВ“ кои наводно го вадат Спасов со пиштол од автомобилот се припадници на „Алфите“, а не насилници од коишто тој бегал. Со снимките располагало единствено УБК, а тие одбиле да ги достават снимките од СВР -Скопје, дознава НОВАТВ од извори во скопската полиција.
Управата за безбедност и контраразузнавање не ги дала снимките од камерите на кои е снимен инцидентот на дополнителниот заменик министер Диме Спасов на СВР Скопје, дознава НОВА од полициски извори. УБК е единствената институција во чие владение се безбедносните камери од улиците, а СВР-Скопје ги побарало за да може да ги расветли случувањата од таа ноќ. Денеска овие снимки завршија во провладините медиуми со наслови кои сугеририаат дека Спасов бил гонет од насилни луѓе со пиштоли.
Денеска попладнето на провладините портали се појави видео од безбедносните камери поставени на бандерите низ градот од ноќта кога Спасов предизвика сообраќајни незгоди со службено возило на Агенцијата за вработвање и бегаше од полицијата.
На видеото кое на одредени места е сечено може да се забележи автомобил марка пасат како вози зад министерското возило. Тие се обидуваат да го стигнгат Спасов, а од она што е веќе познато, станува збор за луѓето чие возило било прво удрено таа ноќ и кои што повикале полиција, откако Спасов продолжил како ништо да не се случило.
Порталот „Прес 24“ тврди дека ова е „ексклузивно видео од насилниците кои со пиштоли го бркаат Диме Спасов“, а ова е воедно и приказната која Спасов ја раскажува во јавноста.
На видеото во првиот дел може да се забележи како на семафорите кај фонтаната кај Градскиот парк луѓето чие возило Спасов претходно го удрил се обидуваат да ја отворат вратата, а до нив вози и полициски дифендер кој според МВР бил пратен од полицијата на повик на оние кои го возат пасатот. Во вториот дел видеото Спасов е застанат од друг автомобил од каде излегуваат лица кои се обидуваат да го приведат Спасов, а зад нив се лицата со пасатот.
Полицијата вели дека лицата кои го вадат Спасов од возилото се полициската единица за брзи интервенции „Алфи“ кои претходно го бркаат спасов на повик од оштетените од пасатот.
На видеото со црвени кругови се заокружени рацете на алфите и се тврди дека тоа се насилници кои со пиштоли го гонеле Спасов.
Нејасно е како снимките завршиле во рацете на овој портал, ако се има во предвид дека истите единствено се во владение на УБК.
Полицијата го поседува целиот аудио разговор со луѓето од пасатот кои повикале полиција. Исто така, сопатничката на Спасов веќе дала исказ дека никој не ги бркал, според изјавите од МВР.