Градоначалникот на Скопје, Коце Трајановски, во согласност со известувањата од Министерството за животна средина за нарушениот воздух со РМ10 честиците во текот на пет последователни денови апелира на мерки од прв степен, односно предупредувања и препораки.
Се апелира до сите граѓани да го користат јавниот превоз, граѓаните да не ги користат своите автомобили без поголема потреба и при користењето на возило во него да се возат повеќе лица истовремено.
Возачите на тешките товарни возила се повикуваат да ја почитуваат сообраќајната сигнализација за движење низ градот, а сопствениците и корисниците на камионите да не ги користат доколку немаат регуларно испуштање на отпадните гасови.
Кон граѓаните, град Скопје апелира да користат суво и чисто дрво без примеси од земја и од отпадоци, и при затоплување на своите домови да не користат недефинирани горива и отпадни материи од различни технолошки процеси (отпадно масло, лакирани и обоени отпадоци од дрво и мебел, стиропор, пластична амбалажа, гума или синтетички материјали), додека се препорачува печките на дрво да се користат и одржуваат според упатствата на производителот.
Трајановски препорачува да не се користат ниту уреди за затоплување на просториите и за готвење на фосилни горива, особено ако сопствениците и корисниците се свесни дека немаат обезбедено ефикасно одведување на димните гасови.
Граѓаните се предупредуваат да ги одложат сите активности со корозивни хемикалии, лепаци, бои, лакови, пестициди и слично со коишто се загадува воздухот во просториите.
Се повикуваат раководителите на градилиштата пред пуштање на камионите надвор од градилиштето задолжително да организираат миење на гумите заради отстранување на калта и прашината, а при превоз на материјалот од градежен ископ истиот да биде затворен со церада.
До стопанствениците се препорачува своите технолошки процеси да ги вршат со крајна претпазливост и да одбегнуваат се што не е нужно, а може да влијае на квалитетот на воздухот во градот, како и да соработуваат со зајакнатиот инспекциски надзор од Државниот инспекторат за животна средина и Инспекторатот на Град Скопје.
Се повикуваат граѓаните да го сведат своето движење на отворен простор само на неопходни излегувања, додека на одделни категории на население (малите деца, бремените жени, хроничните болни, постарите луѓе) се препорачува да не излегуваат на улица.
Град Скопје препорачува граѓаните да не ги проветруваат просториите во кои престојуваат.