Навивачите на Шапикоенсе се разбудија со шокантна вест. Речиси цел тим погина на летот за Колумбија во авионска несреќа кај градот Меделин. Преживеаја само тројца фудбалери: Алан Рашел, Данило и Џексон Фолман. Навивачите на бразилскиот второлигаш пред само неколку дена со клубот го славеа најголемиот успех во историјата.
Неверојатна е приказната на осуммина фудбалери кои не патувале со тимот. Неколкумина од нив дојдоа утрово во соблекувалната на клубот и во солзи ги дочекуваа најновите вести. На кобниот лет била делегација од најмалку 41 лице поврзано со Шапикоенсе, вклучувајќи го целиот прв тим.
Напаѓачот Мартинукио не може да се помири и постојано зборува: „Тоа не е вистина“, пренесуваат локалните медиуми.
Екипата на Шапикоенсе утре требаше да игра финале против меделинскиот Атлетико Национале. Во авионот биле 22 фудбалери на бразилскиот тим, а колумбиското радио Каракол јавува дека меѓу патниците имало и осум вработени во клубот, тројца гости и дури 21 новинар.
Во авионот имало вкупно 81 патник. Од нив 76 погинаа при падот на авионот, а едно лице почина откако беше пренесено во болница.