Јусеин Болт (31) и Алмаз Ајана (25) се прогласени за најдобри атлетичари во 2016 година на гала вечерта во Монте Карло во организација на Интернационалната атлетска федерација (ИААФ). За спринтерот од Јамајка ова е шесто признание во кариерата по трите златни медали на олимписките игри во Рио де Жанеиро колку што освојуваше и во Пекинг во 2008 година и во Лондон во 2012 година. Во сезоната во која не загуби ниту една трка, тој оствари и најдобри времиња на 100 метри (9,81 секунди) и на 200 метри (19,78 секунди).
„Живеам за моментите кога ќе влезам во стадионот и ќе слушнам воздички од трибините. Во Рио беше феноменално. Навивачите се една од причините поради кои одлучив да трчам уште една година. Не сакам да одам во пензија“, рече Болт по добиената награда што ја врачи Себастијан Коу, претседател на ИААФ.
Етиопската натпреварувачка на долги патеки, Алмаз Ајана, за првпат во кариерата е промовирана како најдобра атлетичарка. На Игрите во Бразил таа се закити со златен медал и притоа постави нов светски рекорд во трките а 10.000 метри што сега изнесува 29:17,45 минути. На двојно покусата делница освои бронза што беше единствен нејзин пораз во 2016 година.