Во “Салонот 19,19“, вечерва, ќе биде промовиран новиот роман “Дали го сакате Дали“ од Христо Петрески.
На најновото романескно дело ќе се осврнат проф.д-р Весна Мојсова-Чепишевска и Санде Стојчевски, а фрагменти ќе говори актерот Роберт Велјановски. На крајот од промоцијата, авторот Христо Петрески ќе се претстави со мал авторски монолог на тема “Промоции, романи, (не)читања“.
Романот “Дали го сакате Дали“ е трет роман на Петрески за возрасни, по романите “Лифтот (не) е за двајца“ и “Твоите = мои очи“, со кои со заокружува трилогијата негови романи посветени на актуелно и современо Скопје.
Романот “Дали го сакате Дали“ е поделен во три дела: “Бел град“, “Црн град“ и “Сив град“, а на крајот има и бонус од четири белградски раскази. Како и во претходните романи, и во оваа најнова романизирана објава, авторот го истражува, опишува и демистифицира урбаниот живот и амбиент, со сите негови специфичности, нелогичности и тајни. Така, овојпат, главен лик е анонимниот но извонреден сликар Салватор Дали, кој е всушност питач и живее во подрумите на скопската населба Капиштец. Салватор своите ликовни дела ги подарува за топла чорба или чаша алкохол, а во Белиот, Црниот и Сивиот град се случуваат и безброј други несекојдневни нешта. Како измешаност и микс од реалноста и фикцијата, Петрески испишува стварносно-надреална проза, проговорува јасно и недвосмислено, жестоко и полемички, откривајќи и разгрнувајќи бројни апсурди, парадокси, случувања, појави и феномени…