Основното јавно обвинителство вели дека во домот на кумановскиот полициски началник е вршено претрес по наредба на судија на претходна постапка од Кривичниот суд во Скопје. Одземени биле предмети, а немало наредба за приведување, се вели во соопштението на Основното јавно обвинителство за гонење на организиран криминал и корупција во кое што известуваат дека се води предистражна постапка во врска со кривичните дела Злосторничко здружување и Злоупотреба на службената положба.
Наредбата за претрес на дом е издадена од страна на Судија на претходна постапка од Одделението за организиран криминал и корупција при Основниот суд Скопје 1 – Скопје. Цел на претресот беше пронаоѓање траги на кривично дело или предмети важни за кривичната постапка и нивно одземање. Одземени се предмети што содржат податоци во писмена форма и предмети што содржат податоци во електронска форма, во врска со кривични дела – Злосторничко здружување од чл.394 и Злоупотреба на службената положба и овластување од чл.353 од Кривичниот законик, како и други кривични дела за кои се гони по службена должност. Имајќи ги предвид информациите пласирани во медиумите во врска со преземеното дејствие, особено изнесените информации дека требало да се приведува лицето С.В. Основното јавно обвинителство за гонење на организиран криминал и корупција ја известува јавноста дека преземените дејствија согласно издадената судска Наредба се само за претрес на дом, не и приведување на лицето, известува ОЈО.
Синоќа беше тензично пред домот на полицискиот началник од Куманово, Стојанче Величковиќ. Пред неговито дом се собираа и приврзаници на опозицијата, а тој тврдеше дека ова е монтиран процес во којшто ВМРО-ДПМНЕ сака да му подметне изборни нерегуларности.
Ова е монтиран процес против мене од Јавниот обвинител Марко Зврлевски и од Митко Чавков, и ве молам да се разотидете за да специјалците го напуштат мојот дом. Нема да бидам приведен“, порача Величковиќ.
Обидот за неговото приведување следи само 48 часа по завршување на изборите. Стојанче Величковиќ беше назначен за началник на СВР Куманово во првата техничка Влада, па потоа беше разрешен со заминување на Оливер Спасовски и повторно вратен со неговото враќање на чело на МВР.