Претседателот Ѓорге Иванов денеска, во своето годишно обраќање зборуваше за политичката криза, причините и последиците кои државата може да ги има од неа.
Иванов рече дека политичарите оваа година создале амбиент на страв и на неизвесност за граѓаните. Според него, личната нетрпеливост меѓу политичките лидери и елити се прелеала на целото македонско општество.
„Новинарите, бизнисмените, уметниците, спортистите… станаа заложници на политичка криза во која секоја страна ги гледа грешките на противникот, но е слепа за сопствените грешки и пропусти. Наместо да се натпреваруваат со идеи и со програми, некои политички актери почнаа да се натпреваруваат најпрво со вербални обвинувања, потоа со навреди, па со кривични пријави, за на крај да завршат со недолично однесување“, рече Иванов.
Неодговорното однесување на Брисел и ЕУ се причини за политичката криза
„Неодговорното однесување на НАТО и на Европската Унија кон Македонија неминовно се одрази врз внатрешната политика на државата. Последиците од блокадата станаа причина за нови блокади на Република Македонија. Тука доаѓаме до втората, внатрешна причина за политичката криза. Многупати повторив дека решението на кризата се наоѓа во институциите на државата. Со заобиколувањето на институциите, влеговме во стапицата на Пржинскиот договор. Имавме распуштено Собрание, техничка влада за спроведување избори и прогласена кризна состојба. Безбедносните институции беа блокирани и парализирани со нарушен систем на команда произлезен од Пржинскиот договор. Постоеше висок ризик да не можат да одговорат на заканите со кои се соочуваме како држава“, истакна Иванов.
СЈО е селективно и политизирано
Специјалното јавно обвинителство е селективно и политизирано обвинителство кое наместо инструмент за правда, се сведе на инструмент за уцена на политичките противници. Потпишувајќи го законот за формирање на СЈО, јас не очекував селективност и политизираност во неговата работа. Сето ова што ни се случуваше неминовно водеше кон граѓански конфликт. Во такви услови, бев единствената институција со легитимитет и овластувања да носи одлуки. Наместо да бидам пасивен набљудувач на отворен судир, понудив решение за кризата. Понудив помирување преку помилување на сите кои на еден или друг начин се вклучени во политичката криза. Во состојба во која беше доведена во прашање иднината на државата, помилувањето беше единствениот мирен начин да се замрзнат непријателските намери меѓу спротивставените страни и да се избегне анархија“, смета претседателот.
Попис, двојазичност и државни интереси
Службената употреба на кој било јазик во Република Македонија зависи од статистиката, а единствен начин за добивање реална статистика е пописот. Последниот попис во Македонија беше пред цели 14 години. Тоа е предолг период за која било држава. Без нов попис на населението, не може да се бараат права што зависат од статистиката. Очекувам новата влада што поскоро да спроведе попис за да видиме колку сме, да видиме дали реалноста на теренот соодветствува со тврдењата на некои политичари. Сè уште слушам како одредени лидери на партии јавно лицитираат со унитарниот карактер на државата, со некаква си кантонизација и федерализација, со името на државата и со идентитетот на граѓаните. Тие лицитираат со државните интереси. Недозволиво е некои лидери на парламентарни партии на преговарачка маса да ги ставаат државните интереси на Република Македонија, спротивно на Уставот на Република Македонија.
Живееме во раскарана Македонија- СДСМ и ВМРО-ДПМНЕ да се помират
Ние живееме во слаба и во раскарана Македонија. Раскарана по секоја можна основа. Секогаш кога сме биле поделени, други нè окупирале, раселувале, преименувале и однародувале. Затоа, го повикувам лидерството на двете најголеми партии ВМРО-ДПМНЕ и СДСМ, да смогнат сила за да си простат, да се помират и конечно да се сплотат околу националните интереси на македонскиот народ и државните интереси на Република Македонија. Ве повикувам да престанеме со реториката на патриоти и предавници. Да престанат и нападите кон дипломатските претставници. Да престанеме секогаш вината да ја бараме кај другите. Одредени политички лидери да престанат да се повикуваат и да ги злоупотребуваат имињата на амбасадорите во Република Македонија за да остваруваат свои цели.