Првата прес конференција на новиот американски претседател наликуваше на неговите говори за време на изборната кампања и на неговите десетици секојдневни твитови. Од неа можат да се издвојат неколку важни точки но и војната што ја отвори со новинарите.
Трамп рече дека почитува повеќе медиуми но не и Базфид кои ги нарече „неуспешен куп ѓубре“.
„Мислам дека тие ќе си трпат последици. Веќе ги трпат“, рече Трамп на адреса на Базфид.
Потоа се сврте кон Си-Ен-Ен обвинувајќи ги дека шират лаги додека новинарот на оваа телевизија упорно се обидуваше да постави прашање.
„Бидејќи нè напаѓате, можете да одговорите на едно прашање? Бидејќи ја напаѓате нашата новинска организација, може да ни дадете шанса?“, рече новинарот.
Одговорот на Трамп беше:
„Не вие. Вашата организација е ужасна”, повтори повеќе пати Трамп и не му даваше на новинарот да продолжи:
„Тишина. Не бидете безобразен. Не бидете безобразен. Не, нема да ви одговорам на прашање. Нема да ви одговорам на прашање.“
Работни места
“Јас ќе бидам најголемиот креатор на работни места каков што Господ до сега не видел и тоа навистина го мислам”, изјави Трамп. Тој додаде дека повеќе фирми како Фиат Крајслер или Форд веќе презеле обврска да ги задржат своите активности во САД.
Трамп сака да ги задржи фирмите во САД и да ги спречи нивниот бизнис да го селат во други земји. Тој вети дека ќе воведе 45 отсто царина на кинескиот увоз.
“Имавме фантастични вести во текот на изминатите две недели. Бев активен на економски план”, рече тој и додаде дека многу автомобилски фирми ќе се отворат во САД.
Две добри вести се очекуваат следната недела и тоа од Џенерал Моторс и една фармацевтска индустрија, најави Трамп.
Невработеноста во САД падна на 4.7 отсто во декември а тоа најниското ниво во последните 9 години.
Синовите ја преземаат фирмата на Трамп
Тој изјави дека контролата на својата фирма ја предал на своите два сина Ерик и Доналд Јуниор и работите така ќе останат се додека тој е претседател. Со тоа се избегнува конфликтот на интерес со претседателската функција.
Неговите два сина ќе ја водат фирмата, тоа ќе го прават “професионално и нема да за тоа ми зборуваат”, рече тој.
Неговата ќерка Иванка исто така ќе ги прекине врските со фирмата на Трамп и ќе сконцентрира на семејството во Белата куќа.
Русија
Потоа Трамп се задржа на Русија. За него досиеата со компромитирачки материја од разузнавачките служби кои ги поседувала Русија се “измислени” од неговите противници.
“Ако претседателот Путин не почитува тогаш тоа е адут”, рече тој но призна истовремено дека зад упадот во мејловите на Демократската партија за време на кампањата стои Русија.
Sидот кон Мексико
Конечно тој повтори дека ѕидот на границата со Мексико има намера да го направи веднаш и дека Мексико ќе ги врати парите
“Можев да чекам година и пол за да завршат преговорите со Мексико но ние веднаш ќе почнеме со изградба, не сакам да чекам”, рече тој.