Осомничениот напаѓач во клубот „Реина“ во Истанбул за новогодишната ноќ ја признал вината, соопшти изутринава гувернерот на Истанбул Васип Сахин.
Тој беше уапсен ноќеска. Во нападот во новогодишната ноќ беа убиени 39 луѓе.
Две недели по нападот во клубот „Реина“, осомничениот напаѓач 34- годипниот Абдулгадир Машарипов, е фатен во истанбулскиот кварт Есенјурт, јавија турските медиуми, каде бил со својот четиригодишен син.
Уапсен е во заедничката акција на полицијата и турската тајна служба, а според турската телевизија, уапсени се и три жени и маж по потекло од Киргистан.
https://www.youtube.com/watch?v=iufkQBTP60Y
Според гувернерот на Истанбул, Машарипов е од Узбекистан и наводно припаѓа на централноазиска ќелија на Исламска држава и е познат под името Абу Мохамед Хорас.
Сахин го откри и идентитетот на напаѓачот, иако претходно турската влада одбиваше.
Турските медиуми за апсењето пишуваат дека е апсолутен успех, меѓу другото и затоа што осомничениот е фатен жив.
На адреса во Истанбул беа откриени 150 000 долари, кои според властите биле “платата” за напаѓачот.
Првата фотографија од уапсениот ја објави приватната новинска агенција Доган.
Напаѓачот упадна во познатиот истанбулски клуб „Реина“ на новогодишната ноќ и пукаше врз присутните, при што уби 39 лица, од кои 26 се странци. Десетици други се повредени.
Напаѓачот успеа да избега, а одговорноста ја презеде Исламската држава наводно како одмазда за воените дејства на Турција во Сирија.