Прст во воздух, оружје во рака и лут поглед, фотографијата од убиецот на рускиот амбасадор во Турција кој ја овековечи фоторепортерот Бурхан Озбиличи ја освои првата награда на најреномираниот конкурс за новинарска фотографија, објави World Press Photo.
Жирито ја пофали професионалноста на Бурхан Озбиличи, фотограф-новинар на Associated Press (AP), кој фотографијата ја сними на 19 декември, додека Мевлут Мерт Алтинтас, 22 годишен полицаец, испука девет куршуми во рускиот амбасадор Андреј Карлов во Анкара. Полицаецот го застрела амбасадорот, извикувајќи дека тоа е одмазда за жртвите во Алепо, а потоа и тој беше убиен од обезбедувањето.
Снимката е прегледана 18 милиони пати во само неколку часа по убиството, а фотографијата „обележа важен момент во историјата на Турција“, рече Бурхан Озбиличи, истакнувајќи дека тој само ја работел својата работа.
„Како новинар не можев да си заминам за да ја спасам сопствената кожа“, рече тој.
На конкурсот повеќе од 5.000 фотографи од 125 земји испратиле 80.000 фотографии. Меѓу нив, 45 се наградени во осум различни категории.
„Одлуката беше многу тешка, но на крајот почувствувавме дека фотографијата на годината е експлозивна и сведочи за омразата на нашето време“, изјави Мери Калверт, член на жирито.