Денеска, во рамки на традиционалното саботно мени во книжарницата „Или-или“ по намалена цена може да ги набавите романите „Како да се упокои вампир“ од Борислав Пекиќ и „Светот“ на Хуан Хозе Милјас.
Романот „Како да се упокои вампир“, базиран на личните искуства на Пекиќ од неговата петгодишна робија, е напишан во 1977 година, а објавен е како победник на анонимен конкурс за најдобро прозно дело. Веднаш по откривањето на идентитетот на авторот, романот е забранет и, иако доживува превод на многу странски јазици, на српски е ре-објавен дури во деведесеттите години на минатиот век.
Пекиќ во ова свое дело прави обид да одговори прашањето: Постојат ли големи идеи за кои вреди да се убива?
Борислав Пекиќ (1930-1992) е еден од најзначајните и најценетите српски интелектуалци на дваесеттиот век. Автор е на голем број драми, раскази, филмски сценарија, есеи, мемоарски книги и записи, а централно место во неговиот голем опус заземаат неговите романи „Беснило“, „Атлантида“, „1999“, „Време на чуда“, „Златно руно“ (во 7 тома) и „Како да се упокои вампир“. Заради своите политички ставови, Пекиќ бил апсен, затворан, а подоцна и прогласен за persona non grata во Југославија. Од 1971 година живее во егзил во Лондон, а неговите дела се забранети за објавување, така што поголемиот дел од неговите книги се објавувани под псевдоним, илегално или постхумно.
Хуан Хосе Милјас (1946) пак, е роден во Валенсија. Творештвото го започнува во 1974 год. со деби-романот “Кербер се сенките”. Автор е на следниве романи: “Нередот на твоето име”, “Визијата на давеникот”, “Празната градина”, “Самотијата е ова”, “Враќање дома”, “Мртва буква”, “Азбучен ред”, “Две жени во Прага или Лаура и Хулио”. Милјас е творец на т.н. „articuentos“, критичка литература на границата меѓу новинарски напис и расказ, која третира општествени теми, размисли или проблеми кои се јавуваат во меѓучовечките односи. Добитник е и на книжевните награди “Сесамо”, “Надал” и “Примавера”, а за романот “Светот” ја добива наградата “Планета” во 2007 година. Редовно пишува репортажи и написи во дневниот весик “Ел Паис” и во весниците на групацијата “Пренса Иберика”, за што добива и значајни награди.
Ништо не е поблиско до нас самите од приказна на Хуан Хосе Милјас. Истовремено ништо не е поизненадувачко, полно со напнатост, со невообичаени ефекти и апсурдни ситуации кои се испреплетуваат со неумолива логика: логика на хаосот, носталгија за загубеното чувство на единство, катастрофална потреба да се живее во апокалипса. Романот Светот предизвикува задоволство благодарејќи на ефикасната и прецизна проза, го поведува читателот да се забавува, но истовремено потврдува дека светот е, несомнено, непријателско место во кое сите се прилагодуваме онака како што умееме