Очекуваме дека наскоро ќе ги добиеме потписите од партнерите за да може да го земеме мандатот за состав на влада, изјави Оливер Спасовски, генерален секретар на СДСМ по попладневната средбата со претставници на Алијансата на Албанците.
„ Ние генерално разговаравме за принципите и очекуваме дека наскоро ќе ги добиеме потписите од партнерите за да може да го земеме мандатот за состав на влада“, изјави Спасовски, без да прецизира конкретни детали од средбата.
На прашањето дали има сигнали од ДУИ за забелешките за законот за јазиците, Спасовски одговори дека се уште разговараат за приближување и затворање на сите предлози и принципи во однос на ова прашање.
„ Во врска со предлог законот, реков дека сите одговори ќе ги добиете тогаш кога ставовите на СДСМ и ДУИ ќе бидат усогласени“, рече Спасовски.
Тој нагласи дека на средбата разговарале за иднината на Македонија, за принципите на владеење на идната Влада, за потребите на граѓаните, за остварувањето на националните интереси на Македонија, пред се членството во НАТО и ЕУ, економскиот развој и подобрувањето на животот на граѓаните на Македонија.
Акцент бил ставен и на декриминализацијата и принципите за формирање на парламентарното мнозинство во Собранието, што ќе придонесе за промена на власта, но и за реализација на сите принципи за кои разговарале на денешната средба.