Малопродажните цени на бензините поскапуваат за 1 денар од полноќ, а цените на дизелот и на екстра лесното масло за домаќинство остануваат исти, извести Регулаторната комисија за енергетика.
Така цената на ЕУРОСУПЕР БС-95 изнесува 80,00 ден/лит, а на ЕУРОСУПЕР БС-98 изнесува 81,50 ден/лит. Цената, пак, на ЕУРОДИЗЕЛ (Д-Е V) изнесува 67,50 ден/лит, а на екстра лесното масло за домаќинство (ЕЛ-1) изнесува 56,50 ден/лит.
Малопродажната цена на мазутот М-1 НС се намалува за 0,468 ден/кг и изнесува 41,049 ден/кг.
Со оваа одлука малопродажните цени на нафтените деривати во просек поскапуваат за 0,18 отсто.
Просечната цена на сурова нафта на светскиот пазар во изминатиот 14-то дневен период изнесуваше 102,125 $/барел и е за 1,18 отсто пониска од просечната цена на сурова нафта (103,350 $/барел) по која беа формирани тековните цени на нафтените деривати.
Курсот на денарот во однос на доларот во изминатиот 14-то дневен период изнесуваше 47,7052 ден/$ и е за 1,16 отсто повисок од курсот на доларот (47,1586 ден/$) по кој беа формирани цените.
Референтните цени на нафтените деривати на светскиот пазар во споредба со изминатиот
четиринаесетодневен период бележат зголемување кај бензинот во просек за околу 2,46 отсто или за 23,00 $/тон, кај дизелот зголемување во просек за околу 0,03отсто или 0,30 $/тон и кај мазутот намалување во просек за околу 0,98 отсто или за околу 5,775 $/тон.