Движењето Беса смета дека одлуката на претседателот Иванов да не му го довери мандататот на лидерот на СДСМ е вознемирувачки момент за земјата. Со тоа, според Беса, Иванов е најголемиот прекршител на Уставот, и кога неуставно му го доверил мандатот на претседателот на ВМРО-ДПМНЕ и кога не му го доверил мандатот на претседателот не СДСМ.
„А кога се има во предвид дека тој ја претставува највисоката институција во земјата, а во име на таа институција тој само што не повика на линчување на Албанците од Македонија, само затоа што Албанците потпишале една заедничка декларација на албанските политичките партии од Македонија, ова е веќе алармантно. Затоа ја повикуваме меѓународната заедница, Соединетите Американски Држави и Европската Унија, да го имаат во предвид овој потенцијален ризик за албанската заедница во Македонија и да интервенираат за враќање на правната држава, како и за враќање на државата во евро-атлантскиот пат“, соопштија од Беса по централното претседателство на партијата.
Оттаму ги повикаа граѓаните на ладнокрвност и умереност. И нагласија дека ова што се случува денес било уште еден аргумент дека спасот на ова земја е само „нејзиното редефинирање во согласност со мултиетничката реалност на земјата“.