Агенцијата за електронски комуникации побара од Собранието на РМ да дозволи измени во годишниот финансиски план за годинава, при што од средствата кои на АЕК ѝ се останати од лани во износ од 9,17 милиони евра, сума од 1,3 милиони евра би биле дадени за изградба на аква паркот во Карпош во комплексот на Спортскиот центар „Борис Трајковски“.

Според Законот за електронски комуникации, нереализираните средства Агенцијата треба да ги пренесе во годишниот план за следната година и тие можат да се користат за „развој на електронските комуникации и информатичкото општество, но и за други работи од значење на Република Македонија…“.

АЕК ЌЕ ПЛАТИ ЗА АКВА ПАРК…

Инаку, договорот за аква паркот во Карпош СП „Борис Трајковски“ го чини вкупно 4,5 милиони евра и е склучен со три фирми: турската „Полин“, која ќе ги достави тобоганите и други елементи и ќе наплати 1,95 милиони евгра, „Жикол“ од Струмица, која ќе ги врши градежните работи и ќе наплати 1,99 милиони евра и „Електро-унион“ од Скопје која ќе ги спроведе електричните инсталации и ќе наплати 527 илјади евра.

Ова значи дека од вкупната сума од 4,5 милиони евра, колку што се потребни за аква паркот, 29 отсто ќе покрие АЕК. Владата уште во октомври преклани има одлучено Агенцијата да учествува во финансирањето на проектот, а конечен заклучок за ова има донесено септември лани. СП „Борис Трајковски“, пак, од АЕК има побарано 1,46 милиони евра во февруари годинава, но се чини, ќе мора да се задоволи со 1,3 милиони.

Инаку, од вкупниот вишок средства од 9,17 милиони евра, колку што на АЕК ѝ останале од лани и кои ќе бидат пренесени годинава, најголем дел ќе бидат потрошени за дигитализацијата. АЕК за оваа намена ќе даде 3,17 милиони евра на ЈП „Македонска Радиодифузија“, а 3 милиони евра ЈП „Македонска радиотелевизија“.

Ваквата политика значи дека кога станува збор за дигитализцијата, сите државни институции ќе добијат пари за оваа намена, освен граѓаните, кои самите од свој џеб ќе мора да купат сет-топ боксови по цена од 990 денари, ако воопшто сакаат да гледаат било каква телевизија од 1 јуни. Од друга страна, пак, без оглед дали имаат пари или не за оваа опрема или дали воопшто можат да ги гледаат програмите на МРТВ, ним сметките за ТВ претплата редовно ќе им пристигнуваат.

… НО, НЕ И ЗА СЕТ ТОП БОКСОВИ ЗА ПОСИРОМАШНИТЕ

Сегментот на популацијата, кој ќе треба да плати за сет топ боксовите, е еден до најранливите во земјата, покрај социјалните случаи кои ќе добијат 40.000 сет топ боксови од државата. Но, тоа ни оддалеку не е доволно.

Во Македонија, на 576 илјади посебни домаќинства има само 278 илјади претплатници на комерцијални ТВ пакети (кабловски, терестријални – како БумТВ на ОНЕ, или интернет протокол ТВ – како Макс ТВ на Телеком) на кои не им треба дополнителна опрема за телевизија. Од оваа бројка од 278 илјади претплатници, барем 10 отсто се компании, кафеани, кладилници, хотелски соби и слично, што значи дека има само околу 250 илјади домаќинства кои се претплатници. Се смета дека има и неколку десетини илјади претплатници на албанските ТВ пакети Тринг и Дигитал, како и неколку илјади пиратски Дримбокс претплатници и уште толку домаќинства, кои имаат понови телевизори со вграден дигитален приемник, но кои не се претплатени на комерцијални ТВ пакети. На сите овие домаќинства нема да им треба нов сет топ бокс за да можат да гледаат телевизија.

Кога сѐ ќе се собере и одземе, испаѓа дека околу 170 до 220 илјади домаќинства ќе треба да купат опрема од 990 денари секое ако сакаат да гледаат било каква телевизија. Со оглед на фактот што овие домаќинства не се претплатени ни на најевтиниот комерцијален ТВ пакет од 450 денари месечно, јасно е дека станува збор за ранлива и посиромашна социјална група, која врз својот грб ќе треба да го понесе товарот на дигитализацијата.

За нив АЕК и Владата немаат пари. Пари има само за државните институции како МРТВ, која од претплата заработува барем 15, ако не и 20 милиони евра годишно и за аква паркови во една од најбогатите скопски општини каков што е Карпош.