И Акционерското друштво за изградба и стопанисување со станбен и со деловен простор склучило договор со битолската компанија за сервисирање лифтови за која вчера Антикорупциската комисија изнесе наводи дека наводно „непостоечка фирма со фалсификувани документи и фалсификувани сертификати,“ е вмешана во „голема измама со тендери за поправка на лифтови во државни институции“.
Наспроти наводите на антикорупционерите кои отворија многу прашања на кои се очекува да одговори истрагата првиот човек на станбеното претпријатие Кристијан Трајковски за Нова вели дека при јавната набака не биле утврдени никакви неправилности, но сепак додека не добијат било каква официјална информација или пак известување во врска со случајот од страна на надлежен орган, нема да почне реализацијата на договореното.
– Акционерското друштво има склучено договор за тековно одржување и сервисирање на лифтови и лифтовски постројки со економскиот оператор Друштво за сервис, ремонт и монтажа на лифтови и трговија на големо и мало и увоз–извоз СЕРВИС ДАКА, Попоски Трајан Битола ДООЕЛ, по претходно спроведена постапка со оглас за јавна набавка. При самата евалуација на понудата и документите, не се утврдени никакви неправилности во доставените документи и докази за утврдување на способноста, согласно критериумите наведени во тендерската документација, па согласно тоа, понудата на економскиот оператор била оценета како прифатлива и истиот бил поканет да учествува на електронска аукција со уште други двајца понудувачи, изјави генералниот директор Кристијан Трајковски за Нова ТВ.
Тој вели дека од вкупно четири пристигнати понуди, поради најниската понудена цена постигната на електронската аукција, а согласно критериумот за избор–најниска цена, истиот понудувач бил избран како најповолен.
На прашање на Нова дали има информација од органите на прогонот дека се води истрага за битолска компанија за сервисирање лифтови, Трајковски вели дека ационерското друштво се уште нема добиено никакво официјално известување од ниту еден државен орган.
– Во моментов, Акционерското друштво нема отпочнато со ниту една активност по однос на било каква реализација на предметниот договор за јавна набавка, така што додека не добиеме било каква официјална информација, или пак известување во врска со случајот од страна на надлежен орган, нема да отпочнеме со реализација на услугите предвидени во договорот со споменатиот економски оператор, вели Трајковски, генерален директор на АД за изградба и стопанисување со станбен простор.
Државната комисија за спречување на корупцијата вчера обзнани дека непостоечка фирма со фалсификувани документи, фалсификувани ИСО сертификати, потписи, конкурирала и во периодот од 2018 до 2022 година добила најверојатно околу 90 тендери за монтажа и сервисирање лифтови, главно од јавни институции, кои давале буџетски средства.
Овие скандалозни наводи го отворија прашањето како е можно некој да добива тендери и да наплатува услуги со народни пари во текот на речиси четири години и никој тоа да не го забележи, а камоли да го санкционира.
Антикорупциска објави дека случајот бил откриен кога Градската општа болница објавила тендер, а Комисијата за јавни набавки во болницата ја проверила валидноста на ИСО сертификатите кај самиот издавач на сертификатите – фирма од Хрватска, од каде добиле одговор дека сертификатите се фалсификувани. Комисијата не ја прифатила понудата од наведената фирма, а таа вложила жалба до државната комисија за жалби по јавни набавки, од каде била одбиена како неоснована.
Според Софка Пејовска Дојчиновска, член на Антикорупциската комисија, станува збор за класичен криминал и доколку инволвираните дејствувале подолг временски период ќе се открие дека тие работеле не само кај јавни инситуции, туку сигурно и во станбени згради.
– Замислете која е опасноста, со лажни сертификати за лифтови, животи се во прашање, предупреди Дојчиновска.
Антикорупционерите вчера не го обелоденија името на засегнатата компанија и побараа брза истрага од МВР и од Обвинителството за организиран криминал, но сепак неофицијално се дозна подоцна дека наводно станува збор за битолска компанија која се сертифицирала во фирма, која пак ги сторила злоупотребите со лажните сертификати. Нова ТВ во телефонски разговор со претставник од компанијата побара одговори на неколку прашања, за кои бевме упатени да ги доставиме и писмено, со најава дека ќе ги добиеме сите одговори, но до објавување на написот, немавме повратна информација од компанијата.
Сепак, сопственикот на битолската компанија се огласи за порталот Независен со тврдење дека во јавноста антикорупционерите ја претставиле компанијата како сторител на кривично дело, наместо да ја заштитат како жртва на измама. Тој дури и обелодени дека токму компанијата „Сервис Дака“ од Битола која, како што изјави, опстојувала цели 30 години во бизнисот со лифтови, како општествено одговорна компанија и го пријавила случајот со фалсификуваните ИСО сертификати.
Фирмата „Сервис Дака има свои подружници низ повеќе градови во земјава и досега не се забележани какви било инциденти.
Стојанка Митреска