Агенцијата за разузнавање (АР) ги негира исказите со кои ВМРО-ДПМНЕ, денеска на прес-конференција, го обвини нејзиниот директор, Еролд Муслиу за судир на интереси поврзани со кадровски решенија во службата. Во соопштението на АР се изразува изненаденост и жалење од начинот на комуникација со национална институција што е задолжена за одбрана и безбедност на државата и општото добро на граѓаните.
Агенцијата воедно апелира до Државната комисија за спречување корупција (ДКСК) целосно да ги провери дезинформациите што, како што наведува, подолг период се пласираат од извесни структури по социјалните медиуми, а денеска и ВМРО-ДПМНЕ ги изнесе на прес-конференција.
Од АР се децидни дека сите нови решенија за унапредување се засноваат на професионалните капацитети и на постигнатите резултати на вработените.
„Ги информираме политичката партија ВМРО-ДПМНЕ и јавноста дека во моментот не се случува никаква „политичка елиминација на целокупниот оперативен состав“. Агенцијата како посебен орган во државната управа не е раководена од партиски определено лице туку искусен професионалец од редовите на Агенцијата со јасна определба да ги спроведе препораките на НАТО и ЕУ за заокружување на процесот на реформите во безбедносниот сектор“, се вели во соопштението на АР.
Во врска со споменатото лице и наводите на ВМРО-ДПМНЕ, Агенцијата за разузнавање потенцира дека се работи за професионалец кој има 18-годишно искуство во безбедносно-разузнавачкиот сектор и важи за истакнат експерт во меѓународни рамки. Во однос на ставовите дека ова лице изнесувало „инсајдерски“ информации од Агенцијата, ја охрабруваме ВМРО-ДПМНЕ да ги достави до надлежните државни институции, стои во соопштението.