На пазарот на труд во Македонија моментно има 7.145 слободни работни места според податоците што се објавени на интернет страницата на Агенцијата за вработување.
Магационери, молери, продавачи, раководители на производство, специјалисти, комерцијалисти, возачи, обезбедувачи на лица и имот, електромонтери, специјалисти за човечки ресурси, бравари, општи администратори, директори, дистрибутери, службеници за организирање на патувања, се само дел од огласените работни позиции.
Статистичките податоци покажуваат дека во првиот квартал од годинава стапката на слободни работни места изнесувала 1,68 отсто. Најголем број слободни работни места, односно 2.929, биле во групата услужни дејности и продажба.
Како што покажува анкетата на работна сила, покрај услужниот, и индустрискиот и градежниот се сектори со најголем раст на вработеноста во првиот квартал од годинава.
Стапката на вработеност во првиот квартал изнесува 44,6 проценти и во однос на истиот период лани е повисока за 0,9 процентни поени.
Бројот на вработени лица е повисок за 2,2 процента, односно за околу 16 илјади лица, во однос на истиот квартал минатата година, при што најголем раст на вработеноста се бележи во индустрискиот сектор (8.700 или 5,2 проценти) по што следуваат градежниот (4.8оо или 9,4 проценти) и услужниот сектор (2.700 или 0,7 проценти), се наведува во документот.
Анализирано според економскиот статус, раст на вработеноста има кај сите категории, освен кај семејните работници. Така, бројот на вработени лица е зголемен за 13.500 или 2,4 проценти, а бројот на работодавачи за 3,200 или 9,4 проценти
Растот на вработеноста е придружен со пад на бројот на невработени, којшто е намален за приближно 12 илјади лица, односно 5,4 проценти на годишна основа. Таквите движења на пазарот на трудот предизвикале стапката на невработеност во првиот квартал годинава да се намали на 21,6 проценти, односно за 1,3 процентни поени споредено со истиот квартал во 2017 година.
Гледано по возрасни групи, невработеноста е намалена кај сите групи, при што најзначајно намалување има кај централната возрасна група од 25 до 49 години, а која изнесува 21 процент.
Бројот на активното население е зголемен за четири илјади лица, односно за 0,4 проценти на годишна основа.
Активното население во првиот квартал 2018 година претставува 56,9 проценти од вкупното работоспособно население што е за 0,2 процентни поена повеќе во споредба со истиот квартал лани.
Просечната месечна исплатена нето-плата по вработен во мај годинава изнесува 24.509 денари.