Денес во партиската централа во Тетово лидерот на ДУИ ќе се сретне со претставници на таканаречената „огнена група“ – Изет Меџити, Муса Џафери и Блерим Беџети. Нивното незадоволсто тие го изразија во неколку наврати а е насочено кон вицепремиерот Артан Груби за кого бараат Ахмети да го смени и да не биде повеќе втор човек во Владата.
Се очекува групата незадоволни да ги стават на маса нивните барања кои ги нарекуваат реформа на партијата. Формално, тие бараат да се дооформат партиските тела – централното претседателство и нaјтесното партиско раководство. Претходно тие преку писмо побараа одлуките во партијата да се носат во партиските органи, а не од страна на двоецот Ахмети – Груби. Незадоволни од работата на министрите „огнените“ бараат смена на првиот вицепремиер и на други министри, како и отчет за досега сработеното во Владата.
Ахмети минатата недела се обиде да го амортизира незадоволството преку средби со ограноците на Чаир и на Сарај, но наместо примирје Џафери му порача на Ахмети ако Груби не замине од Владата дека ќе ескалира политичката војна во ДУИ.
„ Очекувавме дека партискиот живот ќе се канализира преку оформување на партиските органи, а не Груби да ги узурпира сите функции и одлуки. Ахмети ќе треба да реши дали и натаму партијата ќе функционира во хаос или конечно битните политички одлуки и прашања ќе ги носат партиските тела. Остануваме на ставот дека министрите за сработеното треба да реферираат во партијата, неуспешните да се повлечат и да се формираат партиските тела“, рече Муса Џафери во неодамнешната изјава за „Слободен печат.
Многумина на оваа внатрепартиска војна гледаат како борба за власт, а со оглед дека меѓу бунтовниците е Муса Џафери кој речиси една деценија беше во врвот на ДУИ и во извршната власт, нивната реакција повеќе се гледа во насока за битка за враќање на изгубените позиции отколку реформа во партијата.