Али Ахмети и Муса Џафери ја добија тужбата за клевета против поранешниот разузнавач Слободан Богоески, а одлуката во корист на политичарите од ДУИ е објавена во петокот.
Адвокатот на Богоевски, Валентин Зафиров потврди за Телма дека судот ја донел одлуката со која е утврдена граѓанска одговорност за клевета, но и дека тие ќе поднесат жалба до Апелациониот суд. Судијата во предметот прифатил дека изјавите на Богоески во кои ги инкриминира Ахмети и Џафери се дадени во официјална судска постапка водена од американските истражни органи, но смета дека тие јавно пренесени изјави се клевета за двајцата политичари.
Од Основниот суд Скопје 2 за МИА велат дека дека одлуката ќе биде соопштена утре, иако денеска некои медиуми повикувајќи се на изјава на адвокатот на Богоевски, објавија дека тој бил прогласен за виновен и оти нема да им плати материјална штета бидејќи тужителите се повлекле од барањето.
Богоески изјвата ја дал во истрагата за случајот Маѓар Телеком, дека поради земено мито –македонските политичари ја одложувале либерализацијата на пазарот со телекомуникациски услуги.
Лидерот на ДУИ, Али Ахмети и поранешниот вицепремиер Муса Џафери во тужбата бараат вкупна отштета од 5,5 милиони денари. Ахмети бара три милиони отштета, а Џафери 2,5 милиони денари.