Инспекциски служби на Агенцијата за храна и ветеринарство во текот на вчерашниот ден направиле вонредна, дополнителна контрола кај операторот со храна, производител на безалкохолниот пијалок кој во јавноста беше посочен како причина за наводно труење со храна на три малолетни деца во скопската населба Радишани.
Од Агенцијата велат дека е извршена контрола на HACCP планот кој го спроведува производителот, проверени се лабораториските анализи кои согласно со овој план има обврска да ги прави, при што не се констатирани недоследности. Пијалакот согласно важечките правила е соодветно означен, велат од таму.
„Во конкретниов случај не станува збор за небезбеден производ, ниту за труење со храна, туку за непочитување на означувањето од страна на лицата кои го консумирале безалкохолниот пијалок. Причината, децата да се најдат во таква состојба е поради непочитување на предупредувањето кое е назначено на пакувањето, дека пијалакот не смее да го пијат лица под 18 години. Во рамки на редовните инспекциски контроли, Агенцијата кај овој оператор изврши контрола и пред два месеца. И тогаш не се констатирани недоследности во работењето, ниту отстапки во поглед на безбедноста“, велат во Агенцијата за храна.
Од Клиниката за детски болести и понатаму тврдат дека децата дошле со симптоми на труење, повраќале, но не немаат информации колкава количина од енергетскиот пијалак испиле малолетниците.
„Децата беа задржани еден ден на пулмо-токсиколошкото одделение. Дадена им е соодветна терапија, откако претходно им е исплакнат желудникот. Во добра здравствена состојба тие се пуштени дома“, велат на Клиниката за детски болести.
Вчера МВР соопшти дека на 1 ви ноември, три деца од 11 и 12 години од ОУ„Ацо Шопов“ во населбата Радишани со возило на Брза помош биле однесени на Клиниката за детски болести ,каде што било констатирано труење, откако испиле енергетски пијалок „Симбо“. Случајот во МВР го пријавиле лекарите од Клиниката за детски болести, по што е известен одделот за малолетници во полициската станица во Чаир и Агенцијата за храна.
На ова реагираа од претставништвото на компанијата, кои најавија тужба за сите медиуми кои ја објавиле информацијата, која што беше официјално објавена на билтенот на МВР, каде што стои името на производителот на енергетскиот пијалак.