Во Македонската опера и балет, во завесите од приближно 700-тини метри квадратни има азбест. Кај 90 проценти од хористите се констатирани проблеми со дишните патишта, откри денеска првиот човек на Советот за култура на СДСМ, Роберт Алаѓозовски
Скандалозно, од надлежните институции имало потврда дека завесите содржат азбест. Треба да биде утеха нивното тврдење дека тој азбест е во тврда состојба и затоа, замислете, не бил “толку штетен“?!
Ете тоа е само малата слика од оваа институција. Која останува да бледее во сенка на милионскиот нов Театар, на чиј црвен тепих вчера продефилираа скапи бунди, штикли и костуми. Оставајќи ја некаде надвор реалноста на “невидливиот“ човек.
Зошто невидлив?
Зашто Канчевска Милевска и Министерството за култура се запознаени за условите во кои работи Хорот при Македонската опера и балет.
Ова е само дел од бројната документација со којашто Синдикатот и вработените се обидувале да допрат до очите на надлежните. За жал свртени кон милионите евра со кои изминативе години се ѕида Скопје во камен.
Хорот при Македонската опера и балет цели 8 години работи без Колективен договор!
Право на работникот загарантирано со Устав! Платите на хористите се пониски за близу 37 проценти во однос на Оркестарот и Балетот. Затоа што така одлучил директорот на Македонска опера и балет. И за ова, во ова писмо, работниците и се жалат на министерката Канчевска Милевска.
Со одлука на Уставниот Суд е повлечен член 28 од Законот за Култура, што го укинува правото на Директорот на МОБ да ги одредува платите на вработените. Но, оваа измена на Законот грубо се прекршува и никој на тоа не реагира.
Дали требаат и други примери за дискриминацијата на уметниците?! Еве уште еден. Со владина одлука e одлучено на хористите на МОБ да не им биде платен ангажманот за државната прослава за 8-ми септември!
СДСМ во својата нова културна политика, веќе во првите 6 месеци да спроведе низа мерки кои што ќе се однесуваат на санација на најзагрозените делови од нашиот културен систем. Советот за култура на СДСМ донесе нова културна политика и серија на мерки во кои што фокусот ќе биде на одржување и развој на сегашниот културен систем, а не на фараонски проекти.
Тоа значи дека под итно ќе ја скенираме состојбата на теренот и ќе вложиме средства за културната инфраструктура која што во овој момент се распаѓа од најпрестижните институции како што е примерот со МОБ и Музејот на Р. Македонија. Ќе вложиме во обезбедување на достоинствени услови за работа на луѓето од културата и ќе ги поттикнеме институциите да создадат долгорочни планови за одржлив развој.
Според нашите проценки доколку само 10 проценти од парите злоупотребени во скапиот проект Скопје 2014, беа наменети за институциите од вистинскиот културен систем, немаше да има ситуации како денешната, немаше да има влага по музејските депоа, немаше спомен куќите да се уриваат, а уметниците во културата да се чувствуваат дискриминирани, соопшти Алаѓозовски.