Претседателот на Алијансата за Албанците Зијадин Села по средбата со премиерот Зоран Заев и министерката за правда Рената Дескоска кажа дека СЈО треба да продолжи автономно со работа и бараат да се интервенира во Законот во однос на роковите за покренување на истраги. СЈО не ја исполни целта затоа што досега има казна само за претставник на албанска опозиција, рече Села.
-Кога зборуваме за изборен криминал, се знае кој краде избори веќе 17 години. Тоа се оние кои и сега се во власта. Алијансата предлага и да се формира и специјално судство по примерот на Украина кое ќе суди за случаите на СЈО. За да не се дозволи политички партии да ги партизираат судовите, со закон да се санкционира секој функционер кој ја злоупотребил службената должност да не може да биде член на Советот на обвинители и да биде избран за судија. Нема логика да зборуваме за деполитизација на судскиот систем, а да инсталираме бивши функционери во Советот на обвинители кои потоа ќе ги избираат новите обвинители, рече Села.
Во однос на „бомбите“ Села бара тие да се користат како докази во судските постапки и понатаму и сите докази да бидат јавно објавени.
-Имајќи предвид низ каква криза поминавме, сите материјални докази за злосторствата извршени од граѓани кои беа избрани да вршат одредени функции треба да бидат јавно објавени за граѓаните да оценат за кои политичките фигури ќе гласаат, рече Села.
На новинарско прашање, кој го блокира носењето на новиот закон за СЈО, Села кажа: ,,Чинители на бившиот режим го блокираат носењето на законот за СЈО -ДУИ и ВМРО ДПМНЕ“. Тој додаде дека сепак СЈО не ги исполни очекувањата на граѓаните.
-Народот очекуваше тие да ги откријат милионските суми кои беа злоупотребени и тие пари да бидат вратени, рече Села.