„Алтернатива стана дел од власта со писмен договор, чија прва точка е деблокирање на евроинтеграцискиот процес и започнување на преговорите со Европска унија. Затоа, како партија веруваме дека во оваа година сите политички и државни капацитети треба да бидат концентрирани во реализација на превземената обврска за уставни измени“, порачаа денес од партијата „Алтернатива“.
Започнувањето на суштинските преговори со ЕУ значи поинтензивна динамика на реформи и подобрување на квалитетот на услугите за граѓаните, велат од оваа партија.
Но се додава и дека „Алтернатива“ е посветена, покрај исполнувањето на обврската за признавање на бугарското малцинство и замена на дефиницијата „јазик што го зборуваат повеќе од 20% од населението“ со „албански јазик“, да се направи и важен чекор во борбата против политичката корупција.
„Затоа, предложивме уставен амандман за санкционирање на корупцијата на високо ниво, за што бараме поддршка од внатрешни и меѓународни фактори“, објавија во денешното соопштение.
„Земјата успешно се справува со енергетската криза, обезбедувајќи непрекинато снабдување со електрична енергија и не дозволувајќи енормно поскапување, што беше една од нашите значајни определби во договорот за учество во владата.
Се обидуваме да постигнеме договор за изградба на нов Клинички центар, со уникатен модел на финансирање предложен од нашиот Министер за здравство.
Посветени сме за реформирање на јавната администрација и дигитализација на јавните услуги, олеснувајќи ги административните обврски за граѓаните“, додаваат во соопштението.
„2023-та година е година на уставните измени и на сериозна работа и проекти. За ‘Алтернатива’, предвремените парламентарни избори во овој период би биле губење време и непотребен трошок во буџетот, имајќи предвид дека следната година секако е година на парламентарни и претседателски избори“, сметаат од оваа партија.