Амбасадорите на Велика Британија, САД и Холандија во земјава, Чарлс Гарет, Џес Бејли и Ваутер Пломп, собираа отпадоци на кејот од реката Вардар.
Амбасадорите се приклучија кон акцијата за чистење на патеките и бреговите од двете страни на реката, што се одвива под мотото „Clean Up Tweet Up“.
„Ги споивме убавото и корисното и уште еднаш се обидовме да го дадеме својот придонес за намалување на загадувањето, што претставува голем проблем за луѓето и природата. Единствен ефикасен начин за надминување на проблемот е повеќе работа, посветеност и соработка меѓу јавниот сектор, компаниите и граѓаните“, рече Пломп и додаде дека се надева оти од следната година нема да има потреба да чистат на oваа локација бидејќи граѓаните ќе бидат свесни и нема да фрлаат ѓубре.
Скопскиот градоначалник Петре Шилегов, коментирајќи ја денешната акција рече дека тоа е порака и до него како градоначалник и до вработените во ЈП „Комунална хигиена“, но и до сите граѓани на Скопје бидејќи отпадот го создаваат луѓето.