Последна информација од АМСМ е дека магистралниот пат Прилеп – Ресен кај населбата Баир е блокиран од група граѓани бидејќи немаат електрична енергија.
Оттаму соопштија дека патниот правец Македонски Брод – с.Здуње на кој гравитираат 11 села и натаму не е прооден за секаков вид на сообраќај.
Сообраќајот на државните патишта се одвива тековно во зимски услови по претежно влажни коловози, наместа со остатоци од снег на коловозот по интервенција на екипите на Македонијапат.
Во клисурите и засеците можна е појава на помали одрони, особено на патните правци: Кочани – М.Каменица – Делчево, Виница – Берово, Гостивар – Стража, Маврово-Дебар-Струга, Д.Капија – Удово, Катланово-Велес, Крушево – Демир Хисар и Ресен-Буково.
Интензитетот на сообраќај на патните правци надвор од градските средини е умерен. На граничните премини нема подолги задржувања за влез и за излез од државата. АМСМ препорачува исклучително внимателно возење, прилагодена брзина на движење и почитување на поставената сообраќајна сигнализација.
Временска прогноза
Утре ќе има преодно стабилизирање на времето, а од понеделник ќе започне период на претежно облачно
време со повремени врнежи од снег со променлив интензитет. Врнежите повеќе ќе бидат застапени во западните и јужните подрачја. Од средината на работната седмица на пониските места особено на југоисток врнежите ќе бидат од дожд, соопшти УХМР.