На сметките на 16.600 граѓани веќе легнаа околу 21 милион денари средствата од мерката МојДДВ, соопшти денеска министерката за финансии Нина Ангеловска.
„Исплатите се започнати. Пристигнуваат и во трезорот во Министерството за финансии. Најнов податок е дека 16.600 лица веќе добија средства на своите сметки или вкупно се вратени околу 21 милион денари кај граѓаните. Исплатата продолжува постојано, податовите пристигнуваат и се обработуваат“, изјави министерката Ангеловска.
Таа додаде дека исплатата на повратот на ДДВ од скенираните сметки започна денеска и ќе се извршува непречено во претстојните денови, се додека не се исплатат сите граѓани кои оствариле право на поврат во првото тримесечје, во износ од околу три милиони евра.
Ангеловска апелира до сите граѓани да ги проверат трансакциските сметки кои ги внеле за поврат на ДДВ, бидејќи и претстојните денови ќе продолжи повратот на средствата. Министерката посочи дека над 180.000 граѓани секој месец во просек скенираат фискални сметки и дека за овие пет месеци се скенирани над 40 милиони фискални сметки, односно околу 8 милиони сметки месечно.
Според податоците што ги презентира, најмногу се скенира во скопските општини Аеродром, Кисела Вода, Центар и Карпош, и во Битола и Штип во однос на најголемата застапеност на граѓани во тие општини во кои скенираат фискални сметки. Таа потенцира дека од 15 декември започнува МојДДВ #МојаНаграда како мотив плус за граѓаните да скенираат фискални сметки и со тоа да придонесат во борбата против сивата економија.