Англија вчеравечер пред 60.000 гледачи на стадионот „Вембли“ во Лондон ја совлада Данска по продолженија со 2:1 (1:1) и избори финале на Европското првенство против Италија.
Англија офанзивно го почна второто полуфинале на ЕУРО2020, но откако го издржа почетниот притисок Данска воспостави контрола на теренот и прва дојде во водство со гол од слободен удар на Микел Дамсгард во 30 минута.
Англичаните ја анулираа негативата девет минути подоцна со автоголот на данскиот капитен Симон Кјаер.
Второто полувреме не донесе голови на „Вембли“, а Англија направи целосен резултатски пресврт во последната минута од првото продолжение. Каспер Шмајхел најпрво го одбрани ударот од белата точка на Хари Кејн, но англискиот капитен прв стигна до одбиената топка и во вториот обид го совлада данскиот голман.
Гледачите на Вембли беа сведоци на вистински спектакл од првата до последната минута. Борбените Данци први постигнаа гол на натпреварот, што сепак не ги скрши домаќините. Тие одговорија многу брзо и успеаја да израмнат пред паузата. Сепак, до крајот на регуларното време, „трите лава“ не успеаја да ја материјализираат својата супериорност и така дојдоа и продолженијата, по што англискиот капитен Хари Кејн стана национален херој.
Така, заврши големото чекање за Англија која конечно го скрши проклетството во полуфиналињата, кое не можеше да го надмине цели 55 години. За Данска останува утехата за одличните покажани перформанси. Момците на Каспер Хјулманд импресионираа и покажаа уникатен борбен дух дури и без нивната голема ѕвезда Кристијан Ериксен. Сепак, „Црвениот динамит“ не успеа да го повтори својот подвиг од 1992 година, кога стана европски шампион, но нивното учество оваа година сигурно ќе се памети уште долго.
Во финалето, Англија ќе се сретне со селекцијата на Италија, која во вторникот ја совлада Шпанија по драма со пенали. Битката за трофејот е во недела на 11 јули во 21:00 часот по македонско време.