Откако Анима Мунди испрати прашање до Зоолошката градина во Скопје за тоа дали и на кој начин умрело мајмунчето Дино, дојде и одговорот. Во кој се вели дека на 18 декември дошло до тепачка помеѓу два мајмуни, едниот од нив познат во јавноста како Дино, добил тешка повреда на предната нога.

“Веднаш беше упатен на Факултетот за ветеринарна медицина при што беше извршена ветеринарна интервенција за санирање на здобиената повреда. За наша и ваша жал, павијанот Дино не ја преживеа операцијата“, информираат од ЗОО Скопје.

Зоолошката градина демантира дека постоел несоодветен третман од страна на вработените, нарекувајќи ги „обвинувања и шпекулации“ сомнежите на Анима Мунди.

Анима Мунди најави пријава до ЗОО Скопје, прашувајќи зошто досега молчеле.

„Укажуваме на неопходноста јасно да се утврди причината за неговата смрт, затоа што нашите податоци говорат дека умрел после измачување во период од недела дена (отворена рана и скршена нога) која била предизвикана од негрижа на вработен, а која никако немала да биде фатална доколку на мајмунчето му се укажала навремена ветеринарна помош. Бараме во јавноста да се кажат податоци за тоа кој се грижел за Дино, кој му укажувал ветеринарна помош, кога и на кој начин. Инсистираме да се спроведе истрага и информираме дека Анима Мунди ќе поднесе пријава против Зоолошка градина Скопје“, стои во реакцијата на Фејсбук профилот на Анима Мунди.

Здружението повикува и на бојкот на Зоолошката градина која не се грижи доволно за животните.