Половина од младите луѓе во Македонија, односно 51 процент, покажуваат иницијативност за решавање на општествени проблеми, велат резултатите од анкетата што ја спроведе Фондацијата за демократија Вестминстер. Истовремено, дури третина од нив или 34 проценти сметаат дека сега сме подалеку од влезот во ЕУ во однос на минатата година.
Анкетата која е наменета да го покаже социо-политичкото учество на младите во случувањата и во процесите во државата, е спроведена по пат на телефонско јавување на стандарден репрезентативен примерок, во декември 2021 година. Оваа анкета дојде до резултат и дека повеќе од половина од младите односно 57 проценти ретко или никогаш не ги следат политичките настани и случувања во земјата.
Деталните резултати, како што соопштија од Фондацијата за демократија Вестминстер ќе бидат објавени денеска. Тие ќе покажат какви се ставовите на младата популација во однос на иднината на државата, институциите, миграциите, пандемијата и толеранцијата.