Новите членови на Антикорупциската комисија ќе побараат списоци од ЕЛЕМ и од МЕПСО за новите вработувања.
По критиките во јавноста дека синови и ќерки на пратеници и министри се вработуваат во државни институции, антикорупционерите ќе проверуваат дали имало партиско влијание во новите вработувања и дали кандидатите кои се примени на работа ги исполнувале условите на конкурсот.
Од Антикорупциската комисија исто така додаваат дека ќе се проверат и сите вработувања на блиски роднини на фунционери и во останатите јавни претпријатија.
Ќе се користи и методот на случаен избор на нововработени за да се утврди дали има непотизам и во други случаи на вработувања за кои јавноста досега не е информирана.
На денешната прва седница на новиот состав на Антикорупциската комисија членовите утврдија дека во изборот на Нури Бајрами – баџанакот на Талат Џафери за член на Комисијата нема конфликт на интереси.
Претседателката на Комисијата, Билјана Ивановска рече дека според член 8 од Законот за спречување на конфликт на интереси под поимот блиски лица се смета сватовство до втор степен.
„Согласно тоа што за сватовство до втор степен се сметаат родителите на брачниот другар и брат или сестра на брачниот другар, сметаме дека не станува збор за конфликт на интереси. Со оглед на тоа дека со законот не се опфатени сите состојби, ќе се изврши проверка на законите со цел да се спречат вакви ситуации“, рече Ивановска.
Со ждребка, по случаен избор Бајрами денеска беше избран за заменик претседател на Државната комисија за спречување на корупцијата.
„Можам да ви гарантирам, не сум по партиска линија тука. Не, не сум ничиј линк. Мојата сопруга работи во приватен сектор, син ми се отсели од државата поради ова што се случува. Не сум тука да им служам на политичките партии. Пливав во тие води и последните десет години се обидувам строго со никого да не контактирам. Следете ме и држете ме за збор. За мене нема блиски роднини или пријатели, не може никој да влијае“, рече Бајрами.