Државната комисија за спречување на корупција ќе поднесе иницијатива до Јавното обвинителство за постоење основано сомневање за злоупотреба на службената должност и овластување против поранешниот претседател на Основниот суд Скоје 1, Владимир Панчевски, кој си го вработил својот внук на позицијата помлад судски соработник.
Антикорупционерите се сомневаат дека Панчевски извршил посериозно кривично дело од непотизам. Како што појаснија од Антикорупциска на денешната седница, внукот на Панчевски, Јордан Тасевски, бил вработен на позицијата помлад судски соработник, иако воопшто не бил пријавен на огласот за вработување објавен од судот. На огласот биле пријавени 155 кандидати и сите биле одбиени, а бил примен внукот на Панчевски.
„Панчевски ги надминува неговите надлежности. Тоа е незаконско постапување. Не е во прашање повеќе непотизам, туку злоупотреба на службена должност“, рече Катица Николовска, член на ДКСК.