На 20 мај, почнува снимањето на филмот „Децата на сонцето“ според сценарио на Гордан Михиќ, автор на култните „Среќна нова 49“, „Дом за бесење“, „Црна мачка бел мачор“ и др. Филмот е во режија на Антонио Митриќески.
Ова е негов трет игран филм по „Преку езерото“ 0д 1997 и „Како лош сон“ од 2003 година. Продуцент на филмот е Дејан Милошевски. Директор на фотографија е Јарек Шода од Полска. Автор на музиката е Влатко Стефановски, кој во филмот ќе се појави во епизодна улога. Главната машка улога му е доделена на младиот актер Кире Ѓоревски, кој се има образувано во Бугарија, каде живее и работи како драмски актер, пантомимичар и танчер. За женската главна улога, филмскиот тим е во преговори со млада актерка од Македонија или од странство.
Режисерот е во преговори со уште неколку големи домашни и странски актерски ѕвезди, чии имиња се уште не се објавуваат. Филмот ќе се снима 36 дена. Се работи за копродукција меѓу Македонија, Хрватска, Словенија и Србија. Најголемиот дел од средства се обезбедени од Филмскиот фонд на Македонија, а другите држави влегуваат во овој проект како малцински. Речиси сите локации за снимање се наоѓаат покрај Преспанското езеро, каде што ќе бидат изградени и адаптирани објекти.
„При тоа, филмската екипа ќе обрне сериозно внимание на зачувувањето на природата, бидејќи, целта на режисерот е да ги покаже убавините на Преспа“ соопштуваат од продукцијата на филмот.
Филмот “Деца на зимското сонце” е љубовна приказна. Дејствието се случува на периферијата на едно мало гратче крај Преспанското Езеро. Ангела е ќерка на Кале и Мира, кои имаат уште два сина и една ќерка. Кале има кафеана, во која му помагаат неговата сопруга и децата. Мира дознава дека од Германија е дојден многу богат човек, што се вика Фурда и решава дека ќерка и’ Ангела треба да се омажи за тој богат човек за да се спасат од сиромаштијата. Но, Ангела е во љубовна врска со Марко, телохранителот на мафијашот Сони. Таа жестоко се спротивставува на желбата на мајка си да се омажи со човек кој не го познава…,
„Имам одлични соработници, кои несебично работат. Задоволство ми е да работам со млада екипа, на кои желбата и љубовта за креативна работа им е навистина силна. Случувањата во филмот се проткаени со еден лесен, не наметлив хумор. Да, навистина има доста здрав хумор, верба и надеж во опстанокот на едно семејство. Над се’, “Деца на сонцето” е љубовен филм .
Светот нема да го направиме подобар, ниту поопасен за живеење, го правиме позабавен”, вели режисерот Митрикески.