Тринаесет Срби, припадници на косовската полиција, се уапсени утрово од припадници на косовските специјални сили Росу поради наводна вмешаност во организиран криминал, јави Танјуг, повикувајќи се на свои извори. Апсењата биле извршени во четири општини на северот во Косово со мнозинско српско население.
Специјалните единици на косовската полиција го упасиле шефот на полициската станица во Зубин Поток, кој е од српска националност, меѓутоа за сега не успеваат да го спроведат пред истражните органи, јави МИА од Приштина. Во текот на акцијата се слушнале и пукотници.
Според информации од местото на настанот, околу 100 жители Срби се собрани на протест и го блокирале магистралниот пат во правец на Митровица.
Патот е блокиран со возила и камиони, оневозможувајќи го транспортот на командирот на месната полиција до јужниот дел на Митровица.
Станува збор за осомничени за кривични дела „шверц на стоки“, „злоупотреба на службена положба“, „давање поткуп“, „недозволена трговија“ и други.
Во северниот дел од Косовска Митровица утрово се огласиле сирени за тревога.
Претседателот на Србија Александар Вучиќ нареди ставање на сите единици на Армијата на Србија во состојба на целосна борбена готовност. Тој покренал и дипломатска активност по упадот на косовските специјалци, наведува агенцијата цитирајќи извори во Кабинетот на Вучиќ.
Претходно, и Министерството за внатрешни работи на Србија ги стави во состојба на целосна подготвеност специјалните и посебните едници на полицијата. Наредбата е издадена по упадот на специјалните единици на косовската полиција – Росу на северот на Косово.
Директорот на српската владина канцеларија за Косово Марко Ѓуриќ рече дека косовските специјални единици, со оружје упаднале на север во Косово „со цел да заплашат и предизвикаат паника со апсења што претходните денови ги најави претседателот Александар Вучиќ“. Ѓуриќ во изјаватa за РТС вели дека биле регистрирани и истрели од огнено оружје. Тој обвини дека целта на акцијата е да се предизвика прогон на Србите од овој дел и оцени дека се работи за дирекна закана по мирот.
Косовските медиуми повикувајќи се на полициски извори, објавија дека припадник на косовската полиција е ранет во акцијата, но официјална потврда на оваа информација за сега се уште нема.
Косовската полиција соопшти дека утрово, во соработка со полцискиот инспекторат, спроведува операција во Северна Митровица, која резултира со приведување на неколку полициски службеници и граѓани.
Според соопштението, на денешната операција ѝ претходела неколкумесечна истрага од страна на Инспекторат на полицијата и Специјалното обвинителство, од која произлегло „основано сомневање за ‘учество или организирање на криминална група’ од страна на некои полициски службеници и граѓани, во врска со кривични дела како ’шверц на стоки’, ’злоупотреба на службена положба’,’давање поткуп’, ’недозволена трговија’ и други.
Полицијата, како што јави МИА од Приштина, тврди дека наишла на вооружен отпор во северот на Митровица, меѓутоа операцијата продолжува, „вклучувајќи апсења и претреси во неколку локации, што резултира со конфискација на релевантни докази, вклучително долго оружје“.
– Полицијата на Косово, во соработка со органите на правдата и полицискиот Инспекторат, останува посветена на остварувањето на своите законски задачи и одговорности, со цел зачувување на јавниот ред и мир, спречување на незаконски дејствија, незазвисно од тоа кои лица се опфатени во таквите кривични дела, се вели во соопштението.
Според медиумите, досега се упасени најмалку пет лица од српска националност, меѓу кои и припадници на косовската полиција.





