Американскиот велосипедист кој во интервју пред два дена го призна допингот, во второ интервју кај Опра изјави дека би сакал повторно да се натпреварува.
„Заслужувам да бидам казнет. Сепак не сум сигурен дека заслужувам смртна казна. Нема да лажам. Би сакал да добијам шанса повторно да се натпреварувам, но тоа не е причината зашто се решив да го направам ова“, изјавил Армстронг во второто, многу поемотивно интервју кај Опра Винфри.
Поради допинг, на Ленс Армстронг му се избришани сите резултати што ги постигнал од август 1998 година, одземени му се седумте титули на Трката околу Франција, медалот од Олимписките игри во Сиднеј и сите останати титули.
Американецот и во второто интервју истакнал дека постојат луѓе кои од почетокот биле свесни дека тој се допингувал, но повторно не сакал да ги открие нивните имињата.
Доказите за Армстронг, дека тој во текот на кариерата употребувал недозволени супстанци, пред американската анти-допинг агенција ги дадоа 11 негови колеги, со цел да добијат само шестмесечни забрани за настап.
Иако посакува повторно да се натпреварува, Амстронг сепак не е оптимист, дека тоа може да се случи.
„Ова е себично, но сакам да добијам уште една шанса, сакам да ми ја укинат доживотната суспензија. Сепак, реално не очекувам дека тоа ќе се случи. Морам да живеам со тоа“, рекол Армстронг.
Некогаш најголемото име на светскиот велосипедизам, признал дека се чувствува посрамено откако аферата била откриена, а мала емотивна криза доживеал кога Опра му го споменала неговиот 13-годишен син Лук, кој го бранел својот татко во училиштето.
„Тогаш знаев дека мора да му кажам. Тој никогаш не ме праша, едноставно ми веруваше. Му кажав повеќе да не ме брани, тој само ми рече дека ме сака и дека тоа нема да се промени“.
Инаку, телевизиската мрежа на Опра Винфри, на која беше емитувано интервјуто, не побарала никаква финансиски надомест за негово емитување, сепак Армстронг признал дека парите сега му се проблем, откако поради аферата го напуштиле сите спонзори