Директорката на Академијата за судии и јавни обвинители, Анета Арнаудовска, денеска, пред почетокот на Меѓународната работилница за стандардите на ЕУ за обука на судии и обвинители, се пожали дека Советот за реформи во правосудството работел многу нетранспарентно.
Таа посочи дека во Нацрт-стратегијата било предвидено одреден процент од судиите да бидат избрани со незавршена Академија, истакнувајќи дека тоа не било прифатено во извештајот на Прибе од 14 септември кога е донесена новата Стратегија.
Според неа, останува сомнежот што ќе биде со изборот на судиите и дали ќе остане процентот што беше заговаран во Стратегијата за реформи, бидејќи, како што рече Арнаудовска, минатата недела на состанок на академиите во Брисел, претставник од Министерство за правда изјавил дека се подготвуваат измени во Законот за судови и дека процентот за избор на академци и луѓе надвор од Академијата ќе биде 60 наспрема 40.
– Таа изјава предизвика голема вознемиреност кај 37-те кандидати во Академијата. Тие се прашуваат од која причина полагаат тешки приемни испити, учат две години, а некој без никаква обука ќе може да се протне во судството, истакна директорката на Академијата.
Арнаудовска изрази незадоволство бидејќи и покрај тоа што се подготвува измена на Законот за Академијата таа не е вклучена, ниту консултирана, како и никој од органите на оваа институција.
– Советот за реформи тргна со многу фронтален напад. Тоа не беше прифатено од Европската комисија, бидејќи ние 12 години работиме со ЕК токму тој процес, изборот на судии преку Академијата да се заврши, бидејќи знаеме колку проблеми имавме во минатиот период со неизборот на академците. Успеавме и последниот академец да се избере и сега одеднаш без никаква анализа или компаративни истражувања се поднесуваат овие предлози, истакна таа.