Лидерот на ВМРО-ДПМНЕ, Христијан Мицкоски ја најавуваше градоначалничката на Скопје, Данела Арсовска, како најдобра менаџерка во Европа, како жена борец која импонира со упорност, харизма и човечност, не пропушташе прилика да зборува во суперлативи во кампањата за локалните избори. Сега, за помалку од една година, за опозициската ВМРО-ДПМНЕ, Арсовска е криминалец и лажга.
Само неколку месеци траеше „бракот од интерес“ на Арсовска и Мицкоски, само до првата кривина. Лидерот на опозицијата при едно негово телевизиско гостување призна дека главна причина за разидувањето со градоначалничката на Скопје е непочитувањето на договореното од претходно. Мисли ли на договорени тендери, кои сега не можат да ги реализираат? Сега им е поважно како лично да испливаат од калта во која заглавија, а која на површина ги извади нивните валканици – дека, ако немаат финансиски интерес, тогаш зошто им е политичкиот.
„Сум верувал во тој концепт. Ако тоа е грев, што сум верувал во концептот на независен кандидат, кој доаѓа од бизнисот, со успешна аура во јавноста. Сме застанале, сме го поддржале и победил тој кандидат. Тоа што претходно сме договориле, а не исполнува, тоа е друга тема“ – рече Мицкоски при неговото гостување на ТВ21. Ама таа друга тема граѓаните веќе ја знаат. Пред очи им се случува театарот со реплики и контра реплики од кои е јасно дека и двајцата се лути оти есапот од пред избори сега не излегува по нивно.
Со ваквите меѓусебни јавни расправии и обвинувања, Арсовска и Мицкоски уште еднаш потврдија дека личните и партиските интереси ги ставаат пред интересите на граѓаните. Последната седница на Советот на Град Скопје се претвори во арена помеѓу Арсовска и советниците од ВМРО-ДПМНЕ со меѓусебни обвинувања за криминал и лажење, а градоначалничката го нарече Мицкоски „шпицен градоначалник“ кој не спаѓа во вредните, чесните и храбрите луѓе во опозициската партија.
Разидувањето помеѓу Арсовска и Мицкоски доаѓа по објавувањето на скандалот за сомнителниот тендер за пречистителна станица во Скопје и меѓусебните обвинувања за криминал, корупција и обид за местење на тендерот. Па во неможност да се договорат Мицкоски ги присили сите негови директори од јавните претпријатија да си поднесат оставка, свесен дека Арсовска ќе тргне во поход да ги разрешува, како што и започна со некои.
Скопјани веќе препознаваат дека со Арсовска и ВМРО-ДПМНЕ, наместо капиталните проекти, кои ќе донесат подобро за сите жители на Скопје, локалната власт се заминува со лични проекти, од кои корист веројатно имаат само малкумина. Нема ништо од модерното Скопје кое заедно го ветуваа во кампањата, а Арсовска како градоначалничка, поради лични каприци, напушти и проекти поддржани, одобрени и целосно финансирани од Европската банка за обнова и развој.
РНТВ