Осигурителниот пазар останува стабилен и развојот на настаните околу Еуростандард банка нема да влијаат негативно врз ликвидноста и солвентноста во работењето на осигурителните компании, истакнаа од Агенцијата за супервизија на осигурување (АСО).
Од АСО посочија дека според последните податоци, вкупната актива на осигурителниот сектор изнесува 26,4 милијарди денари. Осигурителниот сектор го сочинуваат 16 друштва за осигурување од кои 11 вршат работи на неживотно осигурување, а пет вршат работи на осигурување на живот. Само четири друштва за осигурување имаат парични средства и депозити во Еуростандард банка, а вкупната вредност изнесувала 31 милиони денари, што претставува 0,1 отсто од вкупната вредност на активата на осигурителниот сектор.
„Средствата кои осигурениците ги уплатиле по основ на премии во друштва за осигурување се вложени во инструменти и пласмани, почитувајќи ги принципите на диверзификација и нивната вредност на 30 јуни 2020 година изнесува 14.742.452.987 милијарди денари. Во депозити во банки и парични средства на сметки во банки се наоѓаат 4.691.078.198 милијарди денари што е околу 32 проценти од вкупната вредност на сите вложувања кои друштвата за осигурување ги направиле од средствата на осигурениците. Од овој износ, во Еуростандард банка на 30 јуни 2020 се наоѓаат пласмани на две друштва за осигурување во вкупен износ од 24.446.041 милиони денари што претставува 0,5 отсто од вкупната вредност на вложувањата во депозити во банки“, додадоа од АСО.
Од Агенцијата нагласија дека вкупната вредност на средствата со кои располагаат друштвата за осигурување, а се од други извори, односно капитал и останати обврски, изнесува 11.645.170.177 милијарди денари. Од нив, во депозити во банки и парични средства на сметки во банки се 1.485.690.994 милијарда денари или скоро 13 отсто. Од овој износ, 6.624.875 милиони денари се вложени од страна на две друштва за осигурување во Еуростандард банка, што претставува 0,4 проценти од вкупната вредност на вложувањата во депозити во банки и парични средства на сметки во банки.
Од АСО информираа дека во текот на 2019 година, АД за осигурување ЕУРОЛИНК Скопје доби нов сопственик, односно австриската осигурителна група „Граве“ од Грац ги купи сите акции издадени од ова друштво за осигурување од претходниот сопственик, кој е сопственик на банката. Оттука, ова друштво за осигурување не е во сопственичка поврзаност со банката и не постои ризик од пренесување на обврските од банката на друштвото за осигурување.
„Заклучокот што се добива од изнесените факти ја потврдува констатацијата дека не постои никаков ризик дека отворањето на стечајна постапка на Еуростандард банка ќе влијае на исполнувањето на обврските на друштвата за осигурување кои произлегуваат од договорите за осигурување ниту пак ќе се одрази суштински на профитабилноста и солвентноста на друштвата за осигурување“, заклучија од Агенцијата за супервизија на осигурување.