Атанасовска: Усвоена првата тужба од серијата од 800 судски постапки за заштита на правата на вработените во културата, се бара договор со ресорното министерство.
Синдикатот на културата на Република Македонија (СКРМ) поднесе 800 тужби и денеска објавуваме дека се усвојува првата тужба од серијата од 800 судски постапки за заштита на правата на вработените во културата. Со оваа пресуда судот потврди дека правата на културните работници биле повредени со незаконски донесените решенија за плати и дека законитата основа мора да се почитува, изјави денеска претседателката на СКРМ Вера Атанасовска на прес-конференцијата пред Министерството за култура и туризам.
Оваа прва победа, како што рече, е јасен доказ дека борбата за достоинството во културниот сектор е правно издржана, оправдана и заслужена.
И покрај навремените предупредувања на СКРМ дека решенијата се неправно изготвени, Министерството остана глуво, а резултатот денес го кажа судот. Со оваа пресуда се поставува темелот за сите останати 799 постапки кои следуваат. Се потврди дека СКРМ бил во право, а одредени службеници во Министерството за култура кои преку министерот за култура на сила ги спроведоа овие решенија по институциите во грешка. Истите тие службеници, кои во последните две години ги „кројат“ решенијата за плата, повторно донесоа незаконски решенија со номинални износи наместо законска формула. Вакви незаконски решенија беа подготвувани и во минатата и во сегашната власт, од истите луѓе, рече Атанасовска.
Таа потсети дека од Министерството за финансии добиле официјален одговор, потпишан од ресорната министерка дека пресметките на платите во културата се изготвуваат исклучиво во Министерството за култура, додека финансии само ги одобрува нивните фискални планови. Како се дојде до, како што рече, фамозната формула за ускратување на платите, одговор побарале и од Министерството за култура. Иако дописи испратиле и до финансиски и правен сектор и лично до министерот за куктура, одговор, вели таа, не добиле.
Таа повика на разум и договор, Министерството, како што рече, да седне на маса, да се договорат за решавање на спорот и на тој начин да се избегне финансиски колапс во институциите.
На тој начин институциите нема да плаќаат огромни судски трошоци, а Министерот конечно ќе застане зад своите вработени ослободен од притисокот и пласираните лаги на одредени службеници. Доколку тоа не се случи, СКРМ ја продолжува правната битка, но на крајот ќе бара одговорност за оштетениот буџет кој настанал само и заради нечиј каприц, подвлече Атанасоска.