Билансот на бриселските терористички напади во овој момент изнесува 34 мртви и 136 лица ранети од кои некои многу тешко. Се очекува соопштение од властите кога ќе се утврди точниот биланс на жртвите.
Во 8.15 часот белгиското радио ја прекина програмата и јави дека имало две експлозии на бриселскиот аеродром Завентем. Според првите сведочења, едно лице викнало нешто на арапски и се слушнале експлозии и пукотници. Целиот авионски сообраќај беше прекинат а на аеродромот се создаде вистинска паника.
Три бомби биле употребени во двојната експлозија а подоцна белгиската агенција Белга јави дека е најдено оружје на аеродромот но нема официјална потврда за оваа вест. Експлозиите се случиле во близина на шалтерот на белгиската авио компанија а не во близина на американската како што претходни беше јавено.
Аеродромот беше евакуиран и затворен и не е познато кога повторно ќе се воспостави авио собраќајот.
Министерката за здравство Маги Де Блок информираше дека на аеродромот загинале 11 лица а 81 биле ранети од кои некои многу тешко. Сведочењата кои пристигнуваат велат дека некои ранети останале без нозе.
Еден час подоцна, во 9.11 минути две експлозии одекнаа на метро станицата Малбек во близина на ЕУ институциите. Експлозијата се случи во метро вагон кој стоел на станицата. Полицијата веднаш го затвори целото бриселско метро и околните улици беа евакуирани и затворени.
Според последните информации во метрото загинале најмалку 23 лица а 70 се ранети.
Два часа подоцна обвинителството потврди дека се работи за терористички самоубиствен напад но се уште нема информации за терористите.
Сведоците од метрото тврдат дека експлозијата била силна а на местото на настанот дојде специјалната полиција.
Премиерот Шарл Мишел на Твитер напиша дека приоритет е да им се даде нега на жртвите а подоцна побара од населението солидарност и внимание.
Според една поранешна изјава на министерот за внатрешни Јан Јамбон, кога една терористичка ќелија е разбиена, како што се случи по апсењето на Салах Абделслам во петокот, се активира друга.
Метрото е затворено исто како и целиот јавен транспорт, сите железнички станици, сите шопинг молови а евакуирана е и зградата на белгиската влада. Евакуирани се и сите централни улици во Брисел и властите бараат од населението на излегува во централните и европските делови на градот и да не ги напушта работните места ниту училиштата.
Европската комисија јави дека минува на портокалово ниво на тревога што значи дека пристап во ЕУ институциите имаат само вработените.
Мобилната мрежа е преоптерена а операторите препорачуваат да се користат смс пораки и интернет.
По бриселските експлозии, францускот аеродром Руаси и северната железничка станица на Париз воведе посебни безбедносни мерки. Францускиот претседател Франсиа Оланд, премиерот Мануел Валс и министрите за внатрешни и одбрана се на состанок.
Првата реакција дојде од првиот човек на ЕУ Доналд Туск кој испрати сочувство до семејствата на жртвите и ја понуди солидарност и помош на европските институции со Брисел.
Шефицата на европската дипломатија која е во посета на Јордан, на прес конференција со шефот на јорданската дипломатија не можеше да ги спречи солзите поради бриселскиот терористички напад во кој жртви се невини граѓани.