Грчките полицајци од силите за борба против немири сабајлево упаднаа во атинското метро, каде веќе 10 дена по ред штрајкува персоналот против кратењето на платите. Упадот на полицијата во метрото предизвика тепачка со 90те работници кои во текот на ноќта се собраа за да протестираат. Полицијата уапси најмалку 10 лица, а една жена се здоби со полесни повреди.
Иако владата нареди запирање на штрајкот, работниците сепак не се откажуваат. Само некои од нив беа принудени да се вратат на работа, затоа што полицијата им се закани дека ќе ги уапси.
Покрај двете линии на метрото, нема да сообраќаат ниту надземното метро, автобусите, приградските возови и трамваите. Како одговор на владата која објави граѓанска мобилизација на штрајкувачите, синдикатите се одлучија за граѓанска непослушност и да го остават четиримилионскиот град без јавен превоз.
Обвинителството отвори кривична постапка против учесниците во штрајкот поради непочитување на судските одлуки кои го прогласија штрајкот за незаконски.