Поле или аут, добар сервис или не. Ваквите дилеми на линиските судии и тестовите на нивниот фокус за време на меч и островидоста за пад на топчето би можеле да заминат во историја. Асоцијацијата на тениски професионалци (АТП) планира да експериментира на турнирот за млади играчи во Милано од 7 до 11 ноември оваа година.
Мечевите за првпат ќе се играат со главен судија, без линиски асистенти, а во делење на правдата ќе биде вклучена и технологијата „око соколово“. Новата генерација на веќе присутниот систем на големите настани ќе го следи секој поен, а секој спорен ќе биде прикажуван на видеобим.
Од АТП најавија можна имплементација на новитет во иднина што би претставувало револуција во делот на тениската арбитража доколку, се разбира, системот се покаже добар во Милано со образложение дека „тенисерите и тенисерките заслужуваат минимум грешки при носење на одлуките“.