ROTKO books&music го најавува гостувањето на легендарното британско електронско дуо Autechre, едни од најиновативните пионери на глобалната електронска сцена.
По повеќе од три децении влијание и редефинирање на електронската музика, Шон Бут и Роб Браун конечно ќе настапат во Скопје, во октомври 2026 година.
Билетите за овој редок и ексклузивен настан ќе бидат пуштени во продажба задутре, четврток 4-ти декември точно на пладне, 12:00.
Фановите кои сакаат ран пристап до фан-претпродажбата може да се регистрираат на: https://autechre.warp.net/register
По комплетно распродадената турнеја во 2025, Autechre ги очекува уште една екстремно активна концертна година со настапи во Јапонија во февруари и сет други датуми за низ Европа за септември и за октомври 2026 вклучително и нивниот досега најголем хедлајн концерт во Лондон.
Нивното најново издание е достапно на AE_STORE: https://autechre.warp.net.
Autechre со децении важат за појава од сенките во електронската музика – авангардни, технички брилијантни и бескомпромисно иновативни.
Од деби албумот „Incunabula“ (1993), преку култните „Tri Repetae“ (1995) и „LP5“ (1998), до грандиозните, алгоритамски генерирани композиции како „NTS Sessions“ (2018), нивниот звук постојано ги поместува границите на жанрот и инспирира генерации артисти.
Бут и Браун потекнуваат од Рочдејл, Манчестер, каде што во раните ’90-ти започнува нивниот експериментален пат со евтина аналогна опрема и визија што подоцна ќе го обликува она што медиумите го нарекоа IDM (Intelligent Dance Music).
Нивниот прв албум достигна висок пласман на британските indie-листи и отвори пат за нивната легендарна статусна позиција на полето на електронската музика.
Бидете подготвени – ова е музички настан што Скопје ретко го доживува, порачуваат организаторите од ROTKO books&music.