Пратеничката Владанка Авировиќ, која е заменик координатор на Независната пратеничка група на ВМРО-ДПМНЕ и Коалицијата, побара да се направи нова распределба на бројот на пратеници по собраниски комисии и во нив да има место и за овие 8 пратеници.
„Сметаме дека во Парламентот треба да се изврши нова прераспределба на комисиите и пратениците кои учествуваат во работата на останатите комисии. Се додека не се донесе нова прераспределба во однос на овие комисии и она што треба да биде дел од доделувањето на комисии на нашата пратеничка група, но и предлози и учество во останатаите работни тела, сметаме дека е неправедно да се носат одлуки на Комисијата за прашања на избори и именувања“ – рече Авировиќ во Собранието.
Вчера власта го изгуби мнозинството во собраниската комисија за избори и именувања откако пратеникот на БЕСА ги поддржа пратениците на ВМРО ДПМНЕ. Опозицијата ќе има мнозинство и во други собраниски комисии ако се прифати барањето на Алијансата на Албанците пратеници од оваа партија да ги пополнат испразнетите места во комисиите, по оставката на Весел Мемеди од пратеничката функција.
Од владеачката коалиција најавија дека ќе има нов распоред во собраниските комисии затоа што е намален бројот на пратеници на ВМРО ДПМНЕ.
„Распоредот на бројот на пратеници во собраниските комисии се правеше врз основа на резултатите од изборите – кога СДСМ имаше 51 пратеник, а ВМРО ДПМНЕ 49. Но, сега бројот на пратеници на ВМРО ДПМНЕ е 39, пратеничката група на БЕСА се преполови, а се формираше и нова Независна пратеничка група на ВМРО ДПМНЕ. Треба да се направи нов распоред на членовите во комисите“ коментираа пратеници од СДСМ.
ВМРО ДПМНЕ и БЕСА ги надгласаа СДСМ и ДУИ на Комисијата за избори и именувања