Шефот на грчката дипломатија Димитрис Аврамопулос по средбата со вицепремиерот задолжен за европски прашања Фатмир Бесими во Атина, побарал воздржаност во изјавите:
-Важно е додека продолжуваат преговорите во рамки на ОН да се одржи умереност и самовоздржаност. Да се избегнуваат непродуктивни изјави кои ги поткопуваат обидите за изградба на добрососедски врски и не враќаат кон едно балканско минато кое народите од регионот скапо го платија и треба, конечно, да се остави во минатото, изјави Аврамопулос кој побарал побрз ритам во преговорите за името.
Што се однесува до промената на името, Аврамопулос го повторил грчкиот став:
-Ќе прифатиме име со јасна географска одредница, која нема да остави простор за иредентистички политики и нема да има недостатоци во темите поврзани со чувствителните прашања околу почитување на историјата и културата
Тој го поздравил договорот Белград – Приштина, со порака дека ова е пример како доколку постои политичка волја и умереност, може да се решат долгогодишните и сложени спорови.
Вицепремиерот Фатмир Бесими порачал дека во Грција видел добра волја, надеж, пријателство и искрен пристап кон европската перспектива за што побрзо да ја исполнат заедничката цел.